Read Batak Dairi Psalm 41 Bible Online

Psalm 41 - Batak Dairi bible

Psalm 41

¹Psalm si Daud. Bai simenguluken perendè.

²Sayurntua ngo kalak simenarihken jelma ndotè; naing iurupi JAHOWA ngo ia tikan kepenjetten.

³Ikelungkumi janah ipehèdu-hèdu JAHOWA ngo ia, I tanoh èn ipesennang ngo ia janah oda isohken ia mi tangan musuhna.

⁴Tikan mersakit iurupi JAHOWA ngo ia, janah mengolihken kinijuah bana.

⁵Ningku, “Enggo merdosa aku meradepken kono, alè JAHOWA, masèh mo atèmu baku janah pemalum aku.”

⁶Idokken musuhku ngo jahat terèngèt diringku, sèkel kalak i asa matè aku janah ilupaken.

⁷Kalak siroh menongkir aku oda ngo i mpanting ukurna nai. Ipepulung kalak i ngo berita meroha tersèngèt diringku nai isarken tah soh mikè dèba.

⁸Karina simerceggo atè baku merkosik-kosik; simerohana kalohon ngo iranaken kalak i tersèngèt aku.

⁹Nina kalak i ngo, “Mparah kalohon ngo sakitna, oda harapen nèngè ndorok kèkè ia.”

¹⁰Salang dengan sikuketoki kalohon, kalak simangan rebbak aku, enggo mengelèai aku.

¹¹Masèh mo atèmu baku alè JAHOWA, pemalum mo aku, asa ndorok kubales kejahaten alo-alongku.

¹²Mula oda italuken musuhku aku, kubettoh mo magahken lemmo ngo atèmu taba aku.

¹³Ijamoti kono aku kemulihken keborjokenku, janah memaing nggelluh soh amman sumendah rasken kono aku.

¹⁴Poji mo JAHOWA, Dèbata Israel! Poji mo Ia bagèndari dekket soh mi sidekkah-dekkahna! Saut mo tuhu bagidi. Amèn!