Read Batak Dairi Psalm 42 Bible Online

Psalm 42 - Batak Dairi bible

Psalm 42

¹Bai simenguluken perendè. Endè peddah horong si Korah.

²Bagè balkih mengketedohken laè, bagi ngo tendingku mengketedohken Kono, alè Dèbata.

³Kuketedohken ngo Dèbata singgelluh i, cidahari aku ndorok laus mersembah i BagesNa?

⁴Mahar ari berngin tangis aku, pellin èluh panganenku. Terrus ari musuhku mengkusoken, “I dikè Dèbatamu?”

⁵Melui ukurku mula kuèngèt sidekkah ari, tikan laus aku mi Bages JAHOWA rasken jelma mbellang sipepadaken kerja. Merdalan aku i lebbè jelma simerotor ninganna mersurak-surak janah mengendèken endè pemojien.

⁶Kasa melui ukurku janah bulisah? Mengharap taba Dèbata ngo aku. Nai mendokken lias atè nola mo aku baNa, taba Dèbatangku janah sipaluahken aku.

⁷Rennuk ngo ukurku i tanoh buangen ènda, kemulihken i kuèngèt mo JAHOWA. Manun ngo tendingku i aras melui, iampuh laè kerukraken ngo aku; bagè pergeruhguh sampuren Laè Jordan i Delleng Hermon bak Delleng Mizar nai.

⁹Katerra pè ituduhken JAHOWA mo masèh atèNa tikan mahar, asa ndorok merendè aku tikan berngin, janah mersodip taba Dèbata benna kenggeluhenku.

¹⁰Ningku taba Dèbata, simempebèlai aku, “Kasa ilupaken Ko aku? Kasa kennah pukpuk menggong sindersa aku, kumerna itèndes musuh-musuhku?”

¹¹Melala ngo atè-atèngku kemulihken pengerèhè musuh. Pukpuk ngo kalak i mengkuso, “I dikè Dèbatamu?”

¹²Kasa melui ukurku janah bulisah? Merkeposen taba Dèbata ngo aku. Nai mendokken lias atè nola ngo aku tabasa, taba Dèbatangku janah sipaluahken aku.