Read Batak Dairi Psalm 44 Bible Online

Psalm 44 - Batak Dairi bible

Psalm 44

¹Psalm horong si Korah. Endè peddah. Bai simenguluken perendè.

²Alè Dèbata, enggo kudengkoh kami sendiri simasa sinisukutken empung nami tersèngèt perulaen mahantu sinipepadamu i tikki siarnia.

³Kono sendiri ngo memuari bangsa bangsa asa menettap bangsaMu i nagerrina. Icilakai Kono ngo bangsa-bangsa sidèban, tapi ukum bangsaMu ibelli kono ngo merrak-merrik.

⁴Oda ngo merkitè peddang irampasi kalak i tanoh i; oda ngo merkitè kegegohen sendiri asa mennang kalak i, tapi merkitè kuasa bak cuhaya pekirohMu ngo, kumerna ngkelleng ngo atèmu taba bangsaMu.

⁵Kono ngo Rajangku janah Dèbatangku, simemerèken kemenangen taba bangsaMu.

⁶Merkitè kuasaMu kutaluken kami musuh nami, dekket pepatuken kalak simenjuhap kami.

⁷Kumerna oda ngo kuasangken panahku, peddangku pè oda ngo i paluahken aku.

⁸Tapi Kono ngo paluahken kami bai alo nami nai, janah menaluken kalak simernggogo atè midah kami.

⁹Nai dak kugegahken kami mo Kono, janah dak merempet mendokken lias atè taba kono.

¹⁰Tapi bagèndari itadingken Kono ngo kami janah memelli kami italuken. Oda nèngè kono dekket rasken nuhnuhen nami.

¹¹Ibelli kono ngo kami mperrus i musuh nami nai, janah irampasi kalak i harta nami.

¹²Ibelli kono ngo kami ibantè-bantè bagè biri-biri, janah isompar-baèrken kono kami mi tengah bangsa-bangsa.

¹³Idèa kono ngo bangsaMu oda pella sadikè hargana janah kadè poda lot laba.

¹⁴Ibakin kono kami gabè sirèhè-rèhèen cibal bages ipergait-gaitken kalak idi ngo kami janah menaba-nabai kami.

¹⁵Ibakin kono ngo kami aling-alingen bangsa-bangsa; ipelèng-èlèng kalak i takalna ninganna mengelèai kami.

¹⁶Suntuk ari ngo kami dak itikasi, menggong kememèla janah kebennèen abè,

¹⁷kumerna mendengkoh rèhè-rèhè dekket pengelèai i babah musuh bak perhellem nai.

¹⁸Karina idi enggo sempa bai nami kasi pè kono oda kulupaken kami barang menelbuh padanMu dekket kami.

¹⁹Oda ngo ilausken ukur nami Kono; oda ngo kupesisi kami perèntahMu.

²⁰Tapi itadingken kono ngo kami ibas sigellap; oda mergoldè kami i tengah-tengah binatang penjerngem.

²¹Mula pè kami oda nè menembah Dèbata, tapi gabè mersodip taba dèbata sidèban,

²²pasti ibettoh Dèbata ngo i, kerna ibettoh ngo bilik-bilik perukuren nami.

²³Kemulihken Kono dak ngo kami iasup kematèen, janah ibaing bagè biri-biri sembellihen.

²⁴Kèkè mo ko alè JAHOWA! Kasa Ko terpeddem? Kèkè mo ko! Ulang tulak kami soh mi sidekkahna.

²⁵Kasa Ko ciboni, janah mengelupaken sengsara bak kesusahen nami?

²⁶Ndabuh bana sepper kami mi tanoh, gampar ipas abu kumarna talu.

²⁷Kèkè mo ko janah roh mo kono mengurupi kami, peluah mo kami kemulihken masèh atèMu.