Read Batak Dairi Psalm 45 Bible Online

Psalm 45 - Batak Dairi bible

Psalm 45

¹Psalm horong si Korah. Endè ngkelleng. Bai simenguluken perendè. Mengèkutken perlogu: Bunga pancur.

²Huap ngo kata-kata selloh ibas ukurku nai, kusembahken èndèngku bai raja. Tosè pèn sada kalak sipandè mengarang, dilahku kebbas mendokken umpama.

³Kono ngo simaholina kalohon ibas karina jelma nai, dom simerandal ngo karina ranamu, kumerna i ipasu-pasu Dèbata ngo kono soh sidekkah-dekkahna.

⁴Bentingken peddangmu i abakmu, alè raja mahantu, meheji kalohon ngo kono janah rahè!

⁵Njeddak mo ko merdalan menghuju kemenangen pecèndekken kebenaren dekket ketègerren melamlam; merkitè gegohmu rebbut mo kemenangen mbellen!

⁶Panahmu ntajem menelpus pusuh alomu, bangsa-bangsa geppah i lebbè nèhèmu.

⁷Iberrèken Dèbata ngo kuasa bamu lako memerèntah, hot ngo kuasamu soh sidekkah-dekkahna; adil ngo ko memerèntah ginemgemmu.

⁸Ikekelengi kono ngo sibennar janah ikecegoken kono sijahat; kumerna i, Dèbata, Dèbatamu enggo memilih kono, janah merèken tuah bamu mengelebihi raja sidèbanna.

⁹Pakkènmu bau mur, kapias dekket siap-siap meroang-oang ngo ko ibakin peroning-oningen sini istana gading.

¹⁰I tengah rading-rading sini istana lot ngo berru raja-raja. I kamuhun tahta cènder ngo bindohara merpakèen emmas pelangki.

¹¹Alè Berru Raja, dengkohken mo ranangku, lupaken mo bangsa bak sincelketmu.

¹²Kinimberrumu mengabin ukur raja, ia ngo tuanmu, tunduk mo ko tabasa.

¹³Pengisi Tirus merembah persembah bamu; kalak sibèak merusaha memuat ukurmu.

¹⁴Mbengket ngo berru raja i ibagasen riah, mersulam emmas ngo baju sumbungna.

¹⁵Ningan merpakèen mbara-mbèrèng iarak ia mendahi raja, idengani sitertatakken rambu-rambu supan-supanna, kalak i pè lako bai raja ma.

¹⁶Mersurak-surak ngo kalak i merlolo atè tikan itaruhken mbengket mi bagasen istana raja!

¹⁷Kono, alè rajangku, nterrem mo dukakmu daholi lako mengkunduli tahta empungmu. Ibaing ko mo kalak i gabè perkuasa i suberri tanoh èn.

¹⁸Merkitè endè èn kumaherken mo ko turun-tumurun ipoji bangsa-bangsa mo ko soh sidekkah-dekkahna.