Read Batak Dairi Psalm 46 Bible Online

Psalm 46 - Batak Dairi bible

Psalm 46

¹Psalm si Korah. Bai simenguluken perendè. Merkitè logu Alamot.

²Dèbata ngo percilenggemmen janah kegegohenta; dak ngo kebbas ia janah sanggup mengurupi tikan tersessak.

³Nai oda pella mbiar kita, kasi pè dumegger tanoh èn, janah merlennengen delleng-delleng mi terruh laut;

⁴tukasi pè laut mengamuk janah sumampak-sampak, janah dumegger uruk-uruk ibakin penerpana.

⁵Lot ngo baruren laè peloloken kuta Dèbata, bekkas merian Dèbata si Ntembul kalohon idi.

⁶I sidi ngo merian Dèbata, nai oda mo salpun kuta i; Iurupi ngo ia tikan langat mataniari.

⁷Menergang Dèbata, nai melala mo tanoh èn; gontar mo bangsa-bangsa, merumpak mo kerajaen-kerajaen.

⁸Idengani JAHOWA Pergegoh Sisotercodi i ngo kita, ijamoti Dèbata si Jakob ngo kita.

⁹Roh mo kè, tengen mo kadè sinibahan JAHOWA; kelengangen kalohon ngo kariNa sinibakinna i tanoh èn.

¹⁰Ia ngo petadiken geraha i suberri dunia, irepukken ngo baor panah dekket boringin tambeng-tambeng cengko ilekkup ma.

¹¹Nina, “Mentadi mo mergeraha; bettoh mo, Aku ngo Dèbata, termurmur ngo Aku i tengah-tengah bangsa-bangsa, termurmur i suberri dunia.”

¹²JAHOWA Pergegoh Sisotercodi i ngo mendengani kita, Dèbata si Jakob ngo menjamoti kita.