Read Batak Dairi Psalm 49 Bible Online

Psalm 49 - Batak Dairi bible

Psalm 49

¹Psalm horong si Korah. Bai simengu- luken perendè.

²Dengkohken mo, kènè alè segala bangsa, pecingir mo pènggel ndènè, kènè alè pengisi dunia,

³bang jelma keteremmen, bang pè jelma pungkuh-pungkuhna, bang kalak ncor, bang pè kalak bèak.

⁴Naing kuruapken kata-kata bijak, buah pikirenku simbages kalohon.

⁵Naing kuperdatèken mo kata umpama, janah mengelapatisa ninganna menggerrit kucapi.

⁶Oda mbiar aku tikan masa pè kepenjetten, tikan irengngem musuh jahat.

⁷Mengasangken kinibèakna ngo kalak i, janah menggegahken hartana.

⁸Situhuna sada kalak poda ndorok paluahken kaka-anggina, barang menggarar tebbusna bai Dèbata.

⁹Barang kadè pè iberrèken oda bias; mahalsu ngo harga tebbusna,

¹⁰asa maluah ia ibas kematèen nai janah ndorok nggelluh soh sidekkahna.

¹¹Mada, idah ia nola mo magahken kalak bijak pè kennah matè ngo. Meradu mago ngo kalak lengah dekket simoto, janah menadingken hartana bai kalak sidèban.

¹²Tading i pendèbaen mo kalak i soh sidekkah-dekkahna; idi mo bekkas kalak i soh mi ari podi tukasi pè arnia mbellang tanoh kalak i.

¹³Oda ndorok jelma idi pukpuk nggelluh ibagasen kemèbahen; tosè bagè binatang, ia pè lako binasa.

¹⁴Bagidi mo bagian kalak simengasangken dirina; dekket nggelluh ipodi ari kalak simengakap polih ranana.

¹⁵Bagè biri-biri, itentuken ngo kalak i lako matè; kematèen ngo gabè permakan kalak i. Njengkas ngo enggo italuken jelma bujur kalak i; ndor ngo macik daging kalak i i bekkas kalak simatè, ndaoh i bekkasna mèbah nai.

¹⁶Tapi naing ipaluah Dèbata ngo aku, naing ipaluah ngo aku ipas kuasa kematèen nai.

¹⁷Ulang mbiar mula lot sada kalak gabè bèak, janah hartana makin mbuè.

¹⁸Ai matè kessa ia, oda lot ndorok iembah barang kadè, hartana oda ndorok susur mi kuburen raskensa.

¹⁹Balikna mula lot sada kalak meruntung i nggelluhna, janah dak ipepoji-poji kumerna merhasil ia,

²⁰kennah ièkutken ngo empungna mi bekkas gellap soh sidekkah-dekkahna.

²¹Oda ndorok menettap jelma idi nggelluh ibagasen kemèbahen, bagè binatang, ia pè lako matè ngo.