Read Batak Dairi Psalm 5 Bible Online

Psalm 5 - Batak Dairi bible

Psalm 5

¹Psalm si Daud. Bai simenguluken perendè. Merkitè memakè suling.

²Alè JAHOWA dengkohken mo ranangku, datèken mo kelsoh-kelsohku.

³Begèken mo dilo-dilongku janah urupi mo aku, alè Rajangku janah Dèbatangku.

⁴Kumerna baMu ngo aku mersodip, alè JAHOWA, dengkohken mo dilo-dilongku tikan siceggen. Ceggen dèng kuembah pèlèenku janah kupèma pengaloiMu, alè JAHOWA.

⁵Kono ngo Dèbata siso mengkelemoken kejahaten; kalak perjahat oda ndorok mengeloho kono.

⁶Oda ngo tahan kono menengen kalak tunggang, nggogo ngo atèmu midah kalak simengulaken jahat.

⁷Iripasken kono ngo kalak siuè merluap, merlèa ngo iètong ko pengoto-ngotoi dekket pemunuh.

⁸Tapi kumerna mbelgah masèh atèMu ngo, ndorok mbengket aku mi BagesMu. Sujud ngo aku dempak BagesMu simbadia i, janah kusembah ngo Kono ibas nasa pusuh peratènku nai.

⁹Alè JAHOWA, nterrem kalohon ngo musuhku! Teggu mo aku mengulaken gerrek atèMu, janah tuduhken mo dalanMu sikennah dalanenku.

¹⁰Kumerna ukum rana musuhku mak terketoken; dom taki jahat ngo ukur kalak i. Ndalit ngo dilah kalak i mengerana, tapi ukum ukur kalak i dom singgodo.

¹¹Hukum mo kalak i, alè Dèbata, asa cilaka kalak i kemulihken taki-takina sendiri. Puari mo kalak i kumerna mbuè ngo dosa kalak i, kumerna mengalo ngo kalak i taba Ko.

¹²Katerra pè mersampang atè mo kalak siculèndung baMu janah meroang-oang sidekkah-dekkahna. Kelungkumi mo kalak simengkekelengi Kono, asa merlolo atè kalak i kumernaken Kono.

¹³Kumerna ipasu-pasu kono ngo kalak setia baMu, ijamoti kono kalak i merkitè masèh atèMu.