Read Batak Dairi Psalm 50 Bible Online

Psalm 50 - Batak Dairi bible

Psalm 50

¹Psalm si Asap. Mongkam mo JAHOWA Dèbata Pergegoh Sisotercodi i, Itenggoken ngo taba suberri tanoh èn i kebincaren nai soh mi kesunduten.

²I Sion nai kuta simerandalna, roh ngo Dèbata mercuhaya.

³Roh ngo Dèbatanta janah oda sip sambing, I lebbèna api mengelèap-lèap, janah icingkoi angin merudan mahantu.

⁴Idiloi ngo langit dekket tanoh lako menaksikensa menghukum ummatNa.

⁵Nina, “Pepulung mo karina ummatKu sienggo merpadan dekket Aku, janah petegguhken merkitè pèlèen sembellihen.”

⁶Iberitaken langit ngo magahken ihukumken Dèbata ngo ummatNa, janah magahken Ia sendiri ngo perhukumna.

⁷“Dengkohken mo, alè ummatKu, naing mengerana Aku, alè Israel, naing kuindangken ngo taba kènè; aku ngo Dèbata, Dèbata ndènè.

⁸Oda ngo kemulihken pèlèenmu idi asa Kutukas kènè; dak lot ngo i hadeppenKu pèlèen situtungen ndènè.

⁹Oda kuperluken lembu i kandang pinakan ndènè nai, barang kambing i pulungen pinakan ndènè nai;

¹⁰kerna karina binatang sinirambah i milikKu, dekket pinakan i delleng simerribu-ribu.

¹¹Karina manuk-manuk sini delleng pè milikKu ma, dekket sagumanna simenggormit i rambah talintua.

¹²Mula melèhè Aku, oda perlu Kubagahken bamu, kumerna tanoh èn dekket sinna aku ngo sidasa.

¹³Oda ngo kupangan jukut lembu tonggal, oda ma mènum daroh kambing tonggal.

¹⁴Pèlèken mo pèlèen lias atè bai Dèbata, pahèi mo jandimu bai Sintèmbul kalohon i.

¹⁵Dilo mo aku tikan sessak, asa kupaluah kènè, janah asa ipoji kènè Aku.”

¹⁶Tapi taba kalak perjahat nina JAHOWA, “Oda lot hakmu mengeruapken patinKu, dekket mengerana tersèngèt padanKu.

¹⁷Kumerna so nggèut kono mendengkoh pincang-pincangKu, janah itulak kono ngo perèntah-perèntahKu.

¹⁸Mula idah kono sada kalak penangko, ièkutken kono ngo ia, janah merdengan ngo kono dekket kalak siuè merlangkah julu meddem.

¹⁹Dak sijahat ngo iranaken ko, janah dak kebbas mengoto-ngotoi.

²⁰Dak isibihi kono ngo rana siso tuhu taba kaka-anggingku, janah pekata-kataken denganmu sebeltek.

²¹Bagidi mo ulah-ulahmu, tapi sip sambing ngo Aku, nai idokdok kono bagè kono Aku. Tapi bagèndari Kupincang ngo kono, janah karinana idi ntarar Kubaing bamu.

²²Datèken mo, kènè silupa bai Dèbata; jaga ulang sanga Kubinasaken kènè, janah oda lot sipaluahken.

²³Kalak simemèlèken lias atè mahan pèlèen, ia ngo sipesangapken Aku; janah bai kalak simenghantari dalan Kutuduhken mo keluahen siroh bangKu nai.”