Read Batak Dairi Psalm 51 Bible Online

Psalm 51 - Batak Dairi bible

Psalm 51

¹Bai simenguluken perendè. Psalm sinikarang si Daud

²enggo kessa ipincang Nabi Natan ia kumerna merlangkah pilit ia bak si Batsyeba.

³Masèh mo atèmu baku alè Dèbata, kumerna dak ngo Ko mermasèh atè, sasa mo dosangku kumerna masèh atèMu simbelgah i.

⁴Borih mo karina kejahatenku; pepanting mo aku i dosangku nai.

⁵Kumerna kuakui karina kesalahen-kesalahenku dak kuèngèt-èngèt ngo dosangku.

⁶Meradepken Kono, meradepken Kono sambing ngo aku merdosa, janah kuulaken siso selloh dok atèmu. Jadi patut ngo Kono menghukum aku, sènteng ngo hukumMu.

⁷Situhuna, jahat ngo aku kessa nai itubuhken, janah merlapu dosa mungkah i kurungen manik nai.

⁸Mpanting perukuren ngo ipergeddo ko; domi mo ukurku dekket kepantasenMu.

⁹Uras mo aku, asa mpanting aku; borih mo aku, asa mbentaren aku daripada kapas.

¹⁰Duè mo aku mendengkohken berita sampang atè, asa ndorok nola meria-ia balik ukurku sienggo nirennukenmu idi.

¹¹Sèolken mo abèMu i dosa-dosangku nai, janah sasa mo karina kesalahenku.

¹²Tempa mu ukur mbersih baku, alè Dèbata, perimbaru mo pusuh peratènku merkitè ukur sobar.

¹³Ulang pitakken aku i hadeppenMu nai, janah ulang ompat tendiMu simbadia i baku nai.

¹⁴Bakin mo aku merlolo atè nola kumerna keluahen siroh baMu idi nai, berrè mo perukuren uè bangku lako merpenguèi taba kono.

¹⁵Nai kupedahken mo ajarMu bai kalak simerdosa, asa balik kalak i taba kono.

¹⁶Peluah mo aku ipas kematèen nai, alè Dèbata sipaluahken aku, asa ibagasen lolo atè kusukutken ketègerrenMu.

¹⁷Alè JAHOWA, ajari mo aku mengerana, asa dak kupepoji-poji Kono.

¹⁸Oda lemmo atèmu midah pèlèen sembellihen, mula pè kupèlèken pèlèen situtungen, oda ngo lemmo atèmu.

¹⁹Pèlèen bai Dèbata imo ukur rennuk-punuk, ukur tunduk janah tobat oda ngo itulak ko.

²⁰Alè Dèbata, pacidah mo mendè basaMu bai Sion, sasai nola mo dingding batu Jerusalem.

²¹Nai lemmo mo atèmu menjalo pèlèen patutna, pèlèen situtungen bak pèlèen bolet ipèlèken mo lembu tonggal i babo langgatenMu.