Read Batak Dairi Psalm 55 Bible Online

Psalm 55 - Batak Dairi bible

Psalm 55

¹Bai simenguluken perendè. Merkitè menggerrit kucapi. Endè pengajaren si Daud.

²Alè Dèbata, dengkohken mo sodipku, ulang tondali pengidonku.

³Perdatèken mo aku janah aloi aku, mago ngo aku kumerna kesusahenku.

⁴Bulisah ngo ukurku ibaingken asup musuh dekket penèndes kalak perjahat. Kumerna menusahi nggelluhku ngo kalak i, janah ibagasen laga memusuhi aku.

⁵Bulisah kalohon ngo ukurku, kematèen simengerri ngo mencubiari aku.

⁶Isangkemmi berih-berrihen bak mbiar ngo aku, iliput nènèng pengakapku.

⁷Ah, ukum merkabeng kin nemmu aku bagè ndarapati, kabang mo aku menulusi bekkas mènak.

⁸Uè, ngkabang mo aku ndaoh kalohon, janah merian i padang gurun.

⁹Kukelaputi mo menulusi bekkas culènggem meradepken kaba-kaba bak kalisungsung.

¹⁰Alè JAHOWA, bingungken mo musuh-musuhku, sontari mo pengeranaen kalak i, kumerna kekerasen bak perubaten ngo kuidah i kuta i.

¹¹Mahar ari berngin ngo kalak i dak kadap, mengulaken kejahaten dekket memaingken keguluten.

¹²Idikè sambing lot kerukraken; mercèkor nai ngo penèndessen dekket penipuen i onan.

¹³Ukum musuh kin ngo simenikasi aku, ndorok dèng ngo tergong aku. Ukum alongku kin ngo simengelèai aku, ndorok dèng ngo ciboni aku bana nai.

¹⁴Tapi keppèken ko nola ngo, lè kaltungku, supan-supanku, dengangku sindessingna nola ngo simenelbuh aku.

¹⁵Dekah ari merandal ngo perdenganenta, janah cemmal ngo kita merpulung rebbak-rebbakken i Bages Jahowa.

¹⁶Baing mo musuhku matè sintempu janah gelluh-gelluhen susur mi banua terruh, kumerna dom kejahaten ngo bages kalak i, i tengah-tengah kalak i.

¹⁷Tapi dilo-dilo ngo aku taba Dèbata, JAHOWA ngo sipaluahken aku.

¹⁸Mahar ari berngin ngo aku kekelsohen janah tangis, janah ibeggèken ngo sorangku.

¹⁹Ipaluah ngo aku ipenjuhap musuh nai, simerkolan-kolan mengalo aku.

²⁰Dèbata simemerèntah i simenettap nai mendengkohken aku janah menaluken kalak i. Kumerna oda uè kalak i tobat, janah oda merkebiaren taba Dèbata.

²¹Dengnganku kin menjuhap supan-supanna, iosè ngo padanna.

²²Ndalit ngo dilahna mengèlèk-ngèlèk, tapi nggogo ngo ibagasen ukurna. Melamlam ngo ranana, tapi mengerusuk bagè peddang ntajem.

²³Sohken mo rembekbekkenmu bai JAHOWA, nai Itongkel mo ko; kumerna oda ngo ibelli kalak sibujur italuken.

²⁴Tapi ukum Kono, alè Dèbata, iambusken kono ngo kalak i mi bagasen luhung simbagesna kalohon. Nasa pengakkal-ngakkali dekket simengorèken daroh oda soh giam kalak i sitengah umur. Tapi percaya ngo aku baMu.