Read Batak Dairi Psalm 56 Bible Online

Psalm 56 - Batak Dairi bible

Psalm 56

¹Bai simenguluken perendè. Mengèkutken lagu: Ndarapati nono, siroh i bekkas sindaoh nai. Psalm si Daud tikan itangkup kalak Palistin ia i Gat.

²Masèh mo atèmu baku, alè Dèbata, kumerna dak ijuhap ngo aku, pukpuk ngo aku itèndes musuh-musuhku.

³Terrus ari ngo aku idedoh-dedoh alongku; mèduk kalohon ngo memusuhi aku, alè Dèbata Sintèmbul kalohon i.

⁴Sinderrang mbiar aku, merkeposen taba kono ngo aku.

⁵Kupoji ngo Dèbata kumerna kadè sinipadankenna tok ngo aku baNa, nai oda mbiar aku, ai oda mergoldè jelma merimbangken aku.

⁶Terrus ari musuhku menontari perkarangku, pukpuk ngo kalak i menulusi dalan mengago aku.

⁷Merterpu-terpuk ngo kalak i i bekkas mboni, mengintè-ngintèken sikuulaken, janah menulusi kesempaten lako memunuh aku.

⁸Lot ngo ndia keluahen bai kejahaten kalak i? Ripasken mo kalak i ibas lagaMu, alè Dèbata!

⁹Ibilangi kono ngo aringku kadap, janah ibettoh kono ngo buè èluhku; oda ngo ndia iètongi Kono idi?

¹⁰Tikan i ari dilo-dilo aku baMu, sondar mo musuhku ilentem, karna kubettoh ngo Dèbata kan aku.

¹¹Kupoji ngo JAHOWA Dèbata, kumerna kadè sinijandikenna.

¹²Tok ngo aku baNa, nai oda mbiar aku, ai oda mergoldè jelma merimbangken aku.

¹³Kupahèi mo jandingku baMu, alè Dèbata, janah memèlèken pèlèen lias atè baMu.

¹⁴Kumerna ikelini Kono ngo aku ibas kematèen nai, ijamoti kono ngo aku asa ulang tersundalih. Nai ndorok mo aku nggelluh ibas penjamotien Dèbata, ibas cuhaya simenendangi karina singgelluh.