Read Batak Dairi Psalm 57 Bible Online

Psalm 57 - Batak Dairi bible

Psalm 57

¹Bai simenguluken perendè. Mengèkutken Lagu: Ulang mengago. Psalm si Daud, tikan mperrus ia mi liang lako mengilakken si Saul.

²Masèh mo atèmu baku, alè Dèbata, masèh mo atèmu baku, kumerna bamu ngo aku culèndung. I terruh kabengMu ngo aku ciboni, soh lebbè mentadi kaba-kaba mengamuk i.

³Pingko-pingko ngo aku taba Dèbata Sintèmbul i, bai Dèbata simenampati aku.

⁴I sorga nai ngo Ia mengaloi janah paluahken aku; Italuken ngo karina kalak simendersa aku. Pacidahen Dèbata mo magahken setia ngo Ia bangku, janah dak mengkekelengi aku.

⁵Ikeppung musuh ngo aku, tosè bagè singa kipangan jelma ngo kalak i. Bagè boringin bak panah ngo èpen kalak i, dilah kalak i bagè peddang ntajem.

⁶Alè Dèbata, pacidah mo kehejinMu i langit, dekket kemuliaenMu i suberri tanoh èn.

⁷Itogongi musuhku ngo aku, janah memohok semangatku. Ikurak kalak i ngo geddung i tengah ndalan, tapi kalak i sendiri ngo ndabuh mi bagasen.

⁸Tok kalohon ngo ukurku, alè Dèbata, tok kalohon ngo aku, naing merendè ngo aku janah memoji ko.

⁹Kèkè mo ko, alè tendingku! Kèkè mo ko, ganderang bak kucapi! Naing kudungkul ngo mataniari mbincar.

¹⁰Alè JAHOWA, naing mendokken lias atè aku baMu i tengah bangsa-bangsa. Sèkel aku mengendèken pemojien baMu i tengah-tengah jelma manusia.

¹¹Kerna mbelgah kalohon ngo masèh atèMu sakat mi langit, janah kesetianMu soh mi langit mergiro-giro.

¹²Ialè Dèbata, pacidah mo kehejienMu i langit, dekket kemulianMu i suberri tanoh èn.