Read Batak Dairi Psalm 58 Bible Online

Psalm 58 - Batak Dairi bible

Psalm 58

¹Bai simenguluken perendè. Mengèkutken lagu: Ulang mengago. Psalm bai si Daud nai.

²Kènè alè simencèkèp kuasa, adil ma ngo keputusenmu? Ntèger ma ngo kènè tikan mendabuh hukum taba jelma?

³Oda, jahat ngo taki ndènè, janah mengasangken gegoh i nagerri èn.

⁴Enggo laling kalak perjahat mungkah i kurungen manik nai enggo menipu kalak i kessanai itubuhken.

⁵Merracun ngo kalak i bagè nipè merbisa, janah menutup pènggelna bagè nipè senduk tongkik

⁶siso mendengkoh sora sipandè menebbut, barang sora sipandè mertabas.

⁷Alè Dèbata, cuakken mo èpen-èpen kalak i, rengkat mo sabit singa-singa bajar i, alè JAHOWA.

⁸Baing mo kalak i mersep bagè laè merhuap, bagè anak panah sienggo majel.

⁹Baing mo kalak i bagè cih menètè bagè godir, bagè anak mbara matè tikan makdèng idah sinterrang.

¹⁰Nderrang makdèng satdar, enggo mago kalak i, bagè rambah keddep meratah janah oda dèng mbelgah kerri ikabangken angin, nidokdok bagè suan-suaen ngkerrah.

¹¹Mengidah ihukum kalak perjahat, merlolo atè kalak sibujur, janah memorih nèhèna ibas daroh kalak durhaka.

¹²Nai idokken dèba mo, “Terolih pahala ngo gia kalak selloh, tuhuna ngo, lot ngo Dèbata simenghukumi tanoh èn.”