Read Batak Dairi Psalm 59 Bible Online

Psalm 59 - Batak Dairi bible

Psalm 59

¹Bai simenguluken perendè. Mengèkutken lagu. Ulang mengago. Psalm si Daud, tikan ipasulak si Saul kalak menjaga bagesna lako memunuhsa.

²Alè Dèbatangku, paluah mo aku i musuh-musuhku nai, jamoti mo aku bai kalak simenjuhap aku nai.

³Paluah mo aku bai kalak simengulaken jahat nai, kelini mo aku bai pemunuh-pemunuh nai.

⁴Tengen mo, iambat kalak i ngo aku, naing ibunuh, merpulung ngo jelma-jelma jahat naing mengalo aku; keppèken oda ngo kumarna enggo kuulaken dosa barang memaingken pengelausien, alè JAHOWA.

⁵Oda ma ngo kumerna kesalahenku, dak sagal-sugul kalak i janah merkebbas-kebbas.

⁶Kèkè mo ko, alè Dèbata Sintèmbul i, urupi mo aku. Alè Dèbata Israel, saksiken sendiri mo. Kèkè mo ko janah hukum bangsa-bangsa, ulang mo mermasèh atè ko midah kalak perjahat simenelbuh.

⁷Balik mo kalak i enggo kessa bon ari, mengerreng bagè biang ninganna mengkulilingi kuta.

⁸Dak mengalingi ngo kalak i janah mengelèai; ntajem ngo rana-rana kalak i bagè peddang, idokdok kalak i ngo oda lot simendengkoh.

⁹Tapi itertabai Kono ngo kalak i, alè JAHOWA, karina bangsa i, icèdurken kono.

¹⁰Kono ngo gegohku, merkeposen mengharapken kono ngo aku, Kono ngo bekkas percibonienku, alè Dèbata.

¹¹Kemulihken mendè basaNa roh Dèbatangku mendahi aku, Ipaduè ngo aku menengen musuhku italuken.

¹²Ulang mo bunuh kalak i, alè JAHOWA, asa ulang lupa bangsangku. Sompar-baèrken janah taluken mo kalak i merkitè kuasaMu, alè JAHOWA simenjamoti kami.

¹³Kumerna merdosa ngo kalak i merkitè kata-kata kalak i, belli mo terjerret kalak i ibas kesombongenna, kumerna dak kucul ngo kalak i menumpahi dekket merluap.

¹⁴Binasaken mo kalak i ibas pungurMu, alè Dèbata, binasaken mo kalak i soh kerri. Nai gennep jelma memettoh Dèbata ngo mengerajai Israel, janah kerajaenNa sap mi suberri tanoh èn.

¹⁵Tikan bon ari balik mo kalak i, mengerreng bagè biang ninganna mengkulilingi kuta.

¹⁶Kadap ngo kalak i menulusi pangaen, janah merngaung mula oda bessur.

¹⁷Tapi kuendèken ngo terèngèt kegegohenMu; gennep ceggen ngo kuendèken tersèngèt kelleng bak setiaMu. Kumerna Kono ngo bekkas percibonienku, bekkasku culèndung tikan masa kesusahen.

¹⁸Alè Dèbata, kegegohenku, kuendèken mo pemoji-mojien baMu, kumerna Kono ngo bekkasku culèndung, alè Dèbata sikukekelengi.