Read Batak Dairi Psalm 60 Bible Online

Psalm 60 - Batak Dairi bible

Psalm 60

¹Bai simenguluken perendè. Mengèkutken lagu: Bunga pancur mahan saksi. Endè pemeddahi si Daud,

²tikan mengalo kalak Aram, Mesopotamia ia dekket kalak Aram-Zoba, dekket sinderrangna balik si Joab janah menaluken 12.000 kalak Edom i Napa Masin.

³Itulak kono ngo kami, alè Dèbata, janah memelli kami italuken. Melaga ngo kono taba kami; bagèndari pè dak merpengulaki mo ukurmu bai nami.

⁴Idegger kono ngo tanoh èn sanga merigat; pelias mo sienggo mertelbaken, kumerna mogot-ogot tanoh èn.

⁵Ibelli kono ngo bangsaMu mengakapi ndersa mbotong; jumemba-jemba ngo kami bagè kalak mabuk.

⁶Iberrèken kono sèngèt-sèngèt bai kalak simerkebiaren, asa mpellut kalak i ibas hukumen nai.

⁷Peluah mo kami merkitè kuasaMu, aloi mo sodip nami, asa maluah kalak sinikekelengenmu.

⁸Nina Dèbata i bekkasNa simbadia i nai, “Naing mersurak ngo aku janah memella-mellaken tanoh Sikhem; Napa Sukot kutendungi barang bai isè.

⁹Gilead dekket Manasye milikKu ngo i, Efraim tangkuluk wajangKu, janah Juda tongket kerajaenKu.

¹⁰Tapi Moab imo bekkas pemorihen nèhèngKu; mersurak kemenangen ngo Aku meradepken Pilistea. Kukebekken cipatungKu taba Edom mahan tanda magahken milikKu ngo ia.”

¹¹Isè ndia merembah aku mi Edom? Isè meneggu-neggu aku mi kuta mertaram i?

¹²Alè Dèbata, oda ngo dekket Ko rasken kami? Oda ngo kebbas Ko rasken bala pergunggung nami?

¹³Urupi mo kami meraloken musuh, kerna oda datina pengurupien jelma.

¹⁴Rasken Dèbata, mergegoh kalohon ngo kita, ia ngo simenaluken musuhta.