Read Batak Dairi Psalm 61 Bible Online

Psalm 61 - Batak Dairi bible

Psalm 61

¹Bai simenguluken perendè. Merkitè menggerrit kucapi. Bai si Daud nai.

²Dak dengkohken mo dilo-dilongku, alè Dèbata, Peratè-atèken mo sodipku.

³Ndaoh i sapo nai tenggo-tenggo aku baMu, kerna mendellè ngo aku. Itaruhken ko ngo aku mi bekkas percibonien mènak, bekkas si ndatessu kuakap baku;

⁴kerna Kono ngo perlenggemmenku, pertahanen ntegguh meradepken musuhku.

⁵Belli mo aku mendampin i undung-undungMu sidekkah nggelluhku, asa mènak i lenggemmen kabengMu.

⁶Kumarna enggo idengkoh kono padanku, alè Dèbata, janah iberèken kono baku harta gemgemmen kalak si merpenguèi.

⁷Katerra pè nggeddang mo umur raja i, gabè nggelluh ia mercundut-cundut.

⁸Katerra pè mengerajai mo ia soh mi sidekkah-dekkahna bagè raja nipilihMu, alè Dèbata, jamoti mo ia merkitè masèh bak mendè basaMu.

⁹Nai dak kuendèken mo endè pemojien baMu, ninganna memahèi jandingku gennep ari.