Read Batak Dairi Psalm 63 Bible Online

Psalm 63 - Batak Dairi bible

Psalm 63

¹Psalm si Daud, tikan i padang gurun Judea ia.

²Ialè Dèbata, Kono ngo Dèbatangku, kutulusi janah kuketedohken ngo Kono. Bagè tanoh ndagal muas midah laè, bagi ngo aku muas taba kono.

³Duè mo aku menatap kono i BagesMu, janah mengidah kegegohen bak kinitunggungMu.

⁴Mahargaen ngo kelleng atèMu daripada nggelluh, kumara i kupoji mo Ko.

⁵Mendok lias atè aku bamu sidekkahku nggelluh; kutarèken tanganku baMu ningana mersodip.

⁶Kupoji ngo ko merdengan surak oang-oang, kerna kono ngo memessuri tendingku bagè merkitè pangaan merasa.

⁷Tikan galè aku i pedemen, kuèngèt kono; suntuk berngin kupikir-pikiri Kono,

⁸kumerna kono ngo sienggo mengurupi aku; merendè lolo atè aku i terruh kabengmu.

⁹Memmes ngo Kono kucèkèp, tanganMu ngo menongkel aku.

¹⁰Tapi jelma-jelma sinaing memunuh aku susur ngo mi dunia kalak simatè.

¹¹Matè mo kalak i i pergerahaen, janah gabè panganen binatang penjerngem.

¹²Mersampang atè mo Raja kumarna pengurupi Dèbata; kalak simerbulaban merkitèken Dèbata gegah mo, tapi isompel mo babah perluap.