Read Batak Dairi Psalm 66 Bible Online

Psalm 66 - Batak Dairi bible

Psalm 66

¹Bai simenguluken perendè. Sada endè. Mersurak-surak mo bai Dèbata, kènè alè karina tanoh èn!

²Merendè mo janah metunggung baing gerarNa, mermulia mo Ia bakin merkitè pemoji-mojin.

³Dokken mo taba Dèbata, “Metunggung kalohon ngo pemahanMu! Musuh tunduk baMu ibagasen mbiar, kerna mbelgah kalohon ngo kuasaMu.

⁴Suberri tanoh èn sujud mersembah bamu, merendè ngo kalak i memoji gerarMu”.

⁵Roh mo kènè janah tengen mo pemakin Dèbata, kelengangen kalohon ngo pemahanna i tengah-tengah jelma!

⁶Iobah ngo laut gabè tanoh ngkerrah, suberrang ngo empung nami merdalan nènèh. Nai merlolo atè mo kami kumerna pemakinNa.

⁷Memerentah ngo ia merkitè seppuh soh mi sidekkah-dekkahNa. Idatèken ngo bangsa-bangsa, asa ulang terbaing pemberontak tunggang tabasa.

⁸Poji mo Dèbata nami, kènè alè bangsa-bangsa, diloken mo pemojinmu tabasa!

⁹Ia menjamoti kami asa dak tong nggelluh, janah oda ibelli kami ndabuh.

¹⁰Alè Dèbata, Enggo ioji kono kami bagè kalak simeningtingi pirak ibas api.

¹¹Ibelli kono kami ndabuh mi bagasen togong-togong, janah iberrè kono boban mbotong kalohon.

¹²Ibelli kono ngo kami ilutak-lutak musuh; kubellus kami ngo laè merginja bak api. Tapi bagèndari enggo ibabai kono kami mi bekkas nduma.

¹³Kuembah mo pèlèen situtungen mi BagesMu janah memahèi jandingku baMu,

¹⁴jandi sikuruapken tikan kesusahen aku.

¹⁵Kupèlèken baMu pèlèen situtungen ibas pinakan pilihen nai, kambing biri-biri bak lembu tonggal, mercèmpul mi langit cèmberna.

¹⁶Roh mo kènè janah dengkohken mo, kènè alè karina jelma simenguèi, asa kusukutken kadè sinibakin Dèbata baku.

¹⁷Enggo dilo-dilo aku mengido pengurupin baNa; bagèndari kuendèken endè pemojin baNa.

¹⁸Ukum sennang kin ukurku memikiri kejahaten, pasti oda uè JAHOWA mendengkohken.

¹⁹Tapi enggo idengkohken Dèbata aku, isarihken ngo pengidonku.

²⁰Kupoji mo Dèbata kumerna oda ngo itulak aku, janah oda mentadi mermasèh atè baku.