Read Batak Dairi Psalm 68 Bible Online

Psalm 68 - Batak Dairi bible

Psalm 68

¹Bai simenguluken perendè. Endè si Daud.

²Kèkè ngo Dèbata pesompar-baèrken musuhNa, kalak simerceggo atè bana mperrus i hadeppenNa nai.

³Ipelaus Dèbata ngo kalak i, bagè cember sinisempul janah mersep. Bagè lilin melala i bagasen api, bagi ngo kalak perjahat mersep i hadeppen Dèbata nai.

⁴Tapi ukum kalak borjok merlolo atè janah meroang-oang, mersurak-surak lolo atè ngo kalak i i hadeppen Dèbata.

⁵Merendè mo bai Dèbata, poji mo gerarNa, pekadè dalan mbellen tabasa simemasang hembun. JAHOWA ngo gerarna — mersennang-sennang mo i hadeppenNa!

⁶Dèbata simerian i BagesNa simbadia i ngo bapa kalak siso merbapa janah simenarihken kalak simbalu.

⁷Iberèken Dèbata ngo bekkas bai kalak simali-ali; Ia ngo paluahken kalak sikurungen asa sennang kalak i. Tapi ukum kalak simengalo JAHOWA kennah merian i tanoh dakkir.

⁸Alè Dèbata, tikan iteggu-teggu Kono ummatMu merdalan mengelausi padang ngkerrah,

⁹dumegger ngo tanoh èn, darèdè udan i hadeppenMu, kumerna pekiroh Dèbata Sinai, Dèbata Israel.

¹⁰Idabuh kono ngo udan darèdè, janah pesuangken tanohMu sienggo ndagal i.

¹¹Nai i sidi mo bangsaMu merian; ibagasen mendè basaMu, alè Dèbata, ipehèdu-hèdu kono ngo kalak sincor.

¹²JAHOWA ngo maing keputusen, nai iembah daberru-daberru mo berita:

¹³“Enggo mperrus raja-raja bak soridaduna!” Mperrus kalak i bagè ndarapati silaus ngkabang. Ipellaken daberru-daberru mo i bages, pirak, bak emmas sinitadingken. Tukasi pè mèduk siso dekket mergeraha, terolih kemenangen ngo ummat Dèbata.

¹⁵Tikan ipesompar-baèrken Pergegoh Sisotercodi i raja-raja sinisidi, roh mo udan baho i Delleng Salmon nai.

¹⁶Delleng mahantu ngo Delleng Basan, delleng mbuè pucukna.

¹⁷Kasa mo i pucukmu simbuè idi nai cimburu penengenmu taba Uruk Sion sinipilih Dèbata mahan bekkasNa? Merian i si ngo JAHOWA soh mi sidekkah-dekkahna.

¹⁸Merkitè merpuluh ribu kurèta ngkong roh ngo Dèbata i tengah-tengah kalak i ibagasen kehejinNa.

¹⁹Laus ngo JAHOWA mi bekkas sindates; mèduk ngo sitertaban iembah. Ijalo ngo pèlèen bai jelma nai bang bai kalak pemberontak nai; asa rebbak kalak i dekket JAHOWA Dèbata.

²⁰Poji mo JAHOWA, kerna ia ngo Dèbata sipaluahken kita; gennep ari ngo Ia memersan bobanta.

²¹Dèbatanta imo JAHOWA sipaluahken, ipaluah ngo kita i kematèen nai.

²²Pasti ngo ilicat Dèbata takal musuhNa, kalak simerempet nggelluh ibagasen dosa.

²³Nina JAHOWA, “Alè bangsangKu, Kuembah ngo musuhmu i Basan nai kuembah kalak i molih i dangaen laut nai,

²⁴asa iborih kènè nènèh ndènè dekket daroh kalak i, janah bessur bahun-bahun ndènè mendilatisa.”

²⁵Karina ngo mengidah barisen kemenangenMu, alè Dèbata, iarak ngo Dèbatangku, Rajangku, mi bekkasNa merian.

²⁶I lebbè merdalan perendè, i podi simemeltik kucapi; i tengah simerbaju memalu gendang; bagèen mo endè kalak i:

²⁷“Poji mo JAHOWA i tengah pulungen bangsaNa, poji mo JAHOWA, kènè alè karina pemparen si Jakob!”

²⁸Benjamin, marga sicitukna, merdalan kettan lebbè, nai merkolan-kolan mo simpantasniasè Juda i podina nola simpantasniasè Zebulon dekket Naptali.

²⁹Ipido Dèbatamu ngo gegohmu; alè Dèbata, petegguh mo kadè sienggo nibakinmu bai nami.

³⁰Merembah pèlèen ngo raja-raja baMu i BagesMu i Jerusalem.

³¹Senggaki mo Mesir, binatang pengago nitengah arngo. Pincang mo bangsa-bangsa, pulungen banteng idi dekket anak-anakna, mersidedoh bana asa terolih pirak. Ipesompar-baèrken Dèbata ngo karina bangsa-bangsa sikucul mergeraha.

³²Patubong-patubong Mesir roh merembah tembaga; kumelaput kalak Sudan merembah luah bai Dèbata.

³³Merendè mo kènè bai Dèbata, alè karina kerajaen, èndèken mo pemojin bai JAHOWA,

³⁴bana simemellus langit arnia. Dengkohken! Mongkam ngo JAHOWA, merdeggur ngo soraNa mahantu kalohon.

³⁵Akkui mo sah kuasa Dèbata menggem-nggemi Israel, soh mi langit ngo kuasaNa.

³⁶Tuhu-tuhu metunggung ngo Dèbatanta tikan karuar Ia i bekkasNa merian nai. Iberrèken Dèbata Israel ngo kuasa bak kegegohen bai bangsaNa. Terpoji mo Dèbata!