Read Batak Dairi Psalm 69 Bible Online

Psalm 69 - Batak Dairi bible

Psalm 69

¹Bai simenguluken perendè. Mengèkutken logu: Bunga Pancur. Bai si Daud nai.

²Dak paluah mo aku, alè Dèbata, kumerna enggo sennak laè soh mi bergengku.

³Gebbuk ngo aku mi rabang mbages, oda lot bekkasku cènder. Lenneng ngo aku i laè mbages, ianun galombang naik pasang.

⁴Tenggo-tenggo ngo aku sanga ledja janah ngkerrah bergengku. Maker matangku memèma pengurupi Dèbatangku.

⁵Kalak simengkecegoken aku kasi pè oda lot dalanna, buèen dèng daripada buk sinitakalku. Kalak jelma mergegoh naing mengago aku; ijuhap kalak i ngo aku merkitè rana culas. Ipaksa ngo aku mengulaken harta siso kurampasi.

⁶Alè Dèbata, ibettoh Kono ngo kesalahen-kesalahenku oda ngo mboni dosangku baMu.

⁷Ulang mo belli aku perohken kememèla taba kalak simerpos atè baMu, alè JAHOWA, Dèbata Pergegoh Sisotercodi. Ulang duè aku memaing roh lèa taba kalak simenembah Kono, alè Dèbata Israel!

⁸Kumerna kemulihken Kono ngo aku ilèai, kumernaken Kono ngo aku itikasi.

⁹Codi bagè kalak sidèban ngo aku meradepken kadè-kadèngku, bagè kalak perluar bai kaka-anggingku.

¹⁰Makin nggasangna ngo aku kumerna ngkelleng atèngku midah Bagesmu, rèhè-rèhè ndèba simengelèai Kono sempa mi diringku.

¹¹Codi bagè kalak perluar ngo aku meradepken sincelketku, bagè kalak perluar bai kaka-anggingku.

¹²Memakè kaèn goni ngo aku tanda bonek, tapi ialingi kalak i ngo aku.

¹³Gabè buah bibir ndèba ngo aku i bekkas jelma mertumpu, janah endè jelma permabuk-mabuk pè terèngèt aku ngo.

¹⁴Tapi mersodip ngo aku taba kono, alè JAHOWA, alè Dèbata, aloi mo aku tikan katika selloh. Dak urupi mo aku kumerna masèh atèMu simbelgah i dekket kumerna mendè basaMu.

¹⁵Ulang duè aku lenneng ibagasen rabang, paluah mo aku bai kalak simengkecegoken aku nai dekket i laè mbages nai.

¹⁶Ulang belli aku ianun galombang laut pasang, janah lenneng i dangaen laut barang itanem ibagasen geddung.

¹⁷Aloi mo aku, alè JAHOWA, kumerna permendè basa ngo ko janah dak tong mermasèh atè. Dak uè mo ko menulihken aku kumerna mbelgah ngo masèh atèMu.

¹⁸Ulang ko ciboni bai naposoMu èn nai, kumerna susah ngo aku, sudu mo mengurupi aku.

¹⁹Roh mo ko paluahken aku, paluah mo aku bai musuh-musuhku nai.

²⁰Ibettoh kono ngo bakunè pengerèhèina, pengelèai dekket penghinana bangku, idah Kono ngo karina musuhku.

²¹Pengelèaen ngo enggo memakin aku mendennu, janah mendellè. Kutulusi masèh atè, tapi sia-sia, kutulusi pengapoi, tapi oda dapet aku.

²²Baliksa iberrèken nola dèng aji bangku lako panganenku; tikan muas, iberèken bangku cukka mahan ènumen.

²³Belli mo pertamuèen kalak i perohken olpek, janah gabè togong-togong bai tamu-tamu kalak i.

²⁴Baing mo gabè pètung mata kalak i janah dak èangen gurung kalak i.

²⁵Sempaken mo lagaMu bai kalak i, belli mo kalak i iserpai lagaMu simerjollah-jollah i.

²⁶Belli mo longo-longoen perundung-undungen kalak i, janah oda nè lot mengiani undung-undungna i.

²⁷Kerna idersa-dersa kalak i ngo kalak sinihukummu, janah pekata-kataken kalak sinisiksamu.

²⁸Belli mo makin tambahna kesalahen kalak i; ulang mo ampini kalak i.

²⁹Belli mo isasa gerar kalak i ibas bukku kalak singgelluh nai; janah oda tersurat ibas gerar-gerar kalak ntèger.

³⁰Tapi tertèndes ngo aku janah berniten, pekèkè mo aku alè Dèbata, janah peluah mo aku.

³¹Nai pojienku mo Dèbata merkitè endè, petèmbulkensa merdengan lias atè.

³²Dolien ngo idi iakap JAHOWA daripada pèlèen lembu, pèlèen lembu tonggal mbellen.

³³Mengidah idi, merlolo atè mo kalak sitertèndes, sampang mo atè kalak simenembah Dèbata.

³⁴Kumerna idengkohken JAHOWA ngo kalak sincor; oda ngo mak isarihken bangsaNa sinibagasen kurungen.

³⁵Poji mo Dèbata, kènè alè langit dekket tanoh, laut dekket karina simenggormit i bagasenna.

³⁶Paluahenna mo Jerusalem janah pekadèken balik kuta-kuta Juda. Merian i sidi mo bangsa JAHOWA; gabè milik kalak i mo tanoh idi.

³⁷Soh mi kempu-kempuna mo sidasa tanoh i; kalak simengkekelengi JAHOWA ngo mengianisa.