Read Batak Dairi Psalm 7 Bible Online

Psalm 7 - Batak Dairi bible

Psalm 7

¹Tangis si Daud, sininangenkenna taba JAHOWA kemulihken si Kus, kalak Benjamin idi.

²Ialè JAHOWA Dèbatangku, culèndung baMu ngo aku; perkinijuahi janah paluah mo aku tarapken karina kalak simengeletlet aku.

³Ulang duè kalak i tosè bagè singa menjerngem dekket menaran aku janah oda lot pengurupien baku.

⁴Alè JAHOWA Dèbatangku, tah bakunè aku maing curang, memaing jahat taba dengan, barang mengerogiken alo oda meralasen, tah bakunè lot kubaing bagidi,

⁶belli mo aku iletlet janah itangkup musuh, nai ibunuh janah itadingken gampar i tanoh.

⁷Kèkè mo ko alè JAHOWA ibagasen lagaMu, alo mo pengamuk musuh-musuhku. Kèkè mo kono mengurupi aku, kumerna kesèntengen ngo ipergeddo ko.

⁸Pedempu mo bangsa-bangsa i sikulilingMu janah rajai mo kalak i i tahtaMu i sorga nai.

⁹Kono ngo menghukumken jelma manusia; berrèken mo baku ketègerren, alè JAHOWA, kumerna oda ngo salah aku.

¹⁰Pettadi mo kejahaten kalak durhaka janah petegguh mo ukur kalak siburju, kumerna Kono ngo Dèbata sintèger, simemettoh ukur bak pikiren jelma.

¹¹Dèbata ngo perculenggemmenku sipaluahken kalak bujur merukur.

¹²Dèbata ngo perhukum ntèger, gennep tèk menghukum kalak perjahat.

¹³Mula oda mobah pengelako kalak i, kebbas ngo ia mersinjata memunuh kalak i. Igarut ngo golokna janah menintak cèurna, nai petèngkenken panah-panahna merapi.

¹⁵Idah mo, mertaki jahat ngo kalak perjahat; ibakin kalak i ngo taki jahat janah mengulaken tipu jahat.

¹⁶Ikurak kalak i ngo lubang bai sidèban, tapi ia sendiri ngo gebbuk mi bagessen.

¹⁷Jadi ia ihukum kejahatenna sendiri, janah idersa kejukkatenna sendiri.

¹⁸Lias atè kudokken bai JAHOWA kumerna ketègerrenna i, kuendèken endè pemojien bai JAHOWA, Sintèmbul Kalohon i.