Read Batak Dairi Psalm 71 Bible Online

Psalm 71 - Batak Dairi bible

Psalm 71

¹BaMu ngo aku culèndung alè JAHOWA, ulang duè aku termèla.

²Dak paluah mo aku, kerna adil ngo Ko, dak dengkohken janah perkinijuahi mo aku.

³bagè delleng batu mo ko baku bekkasku merian, melungkah dak teppettenku. Kumerna Enggo imangmangken kono lako paluahken aku; Kono ngo bekkasku ciboni dekket culendung.

⁴Alè Dèbatangku, paluahi mo aku bai kalak perjahat nai, i kuasa kalak nggèduk dekket kalak kejam nai.

⁵Kumerna Kono ngo sikuharapken, alè JAHOWA, alè JAHOWA dak tok ngo ukurku baMu mungkah anak perana nai aku.

⁶Sidekkah nggelluhku tunandè taba kono ngo aku ikelungkumi Kono ngo aku kessa nai kin aku tubuh nai dak kupoji mo Kono.

⁷Gabè codien ngo nggelluhku bai jelma nterrem, kumerna Kono ngo mergegoh menjamoti aku.

⁸Dak kupoji ngo Kono, terrus ari dak kuberitaken ngo ketunggungenMu.

⁹Ulang patakken aku kessa tua-tua ulang tadingken aku mula enggo kessa kerri gegohku,

¹⁰kerna dak itersèngèti musuh-musuhku ngo aku, mertaki ngo kalak sinaing memunuh aku.

¹¹Nina kalak i ngo, “Enggo itadingken Dèbata ia; aci siayak janah sitangkup mo ia, kerna oda ngo lot isè paluahkensa.”

¹²Ulang mo ndaoh Kono baku nai, alè Dèbata, alè Dèbatangku, sudu mo urupi aku.

¹³Baing mo kalak simenjuhap aku ipemèla janah isalpuni. Baing mo kalak simertaki naing mengago aku bagè simoto janah idomi kinilèa.

¹⁴Tapi dak merkeposen taba kono ngo aku, janah dak makin ngkatepna memoji Kono.

¹⁵Terrus ari mo dak kusukutken karina pemahanMu sintèger i, dekket keluahen siroh baMu nai siso terbilangen idi.

¹⁶Kopoji ngo pemahanMu mahantu i, alè JAHOWA Dèbata, kumaher ketègerrenMu, ketègerrenMu sambing.

¹⁷Alè Dèbata, iajari Kono ngo aku mungkah poso nai, soh bagèndari kuturiken pemaingMu kelengangen.

¹⁸Alè Dèbata, ulang tadingken aku, soh tua-tua janah ubanen aku, asa kuberitaken kuasa bak kemahantunMu bai karina cundut silako roh.

¹⁹Alè Dèbata, bagè dates langit ngo ketègerrenMu; mbelgah kalohon ngo karina pemaingMu isè ndorok sobok bagè Ko?

²⁰Iberrè kono ngo baku mbuè kinidersa mberrat, tapi pesuangenmu ngo balik gegohku janah pekèkèken aku i pendèban nai.

²¹Makin muat mersangapna mo aku ibakin kono, janah mengapoi aku nola dèng ma.

²²Naing pojienku mo Kono dekket gendang, kumerna setia ngo Ko, alè Dèbatangku. Naing kuendèken pemojien baMu merkitè kucapi, alè Dèbata simbadia Israel.

²³Mersurak ngo aku dom sampang atè, ninganna mengendèken pemojien baMu. Merendè lolo atè ngo daging bak tendingku, kumerna Enggo ipaluah kono aku.

²⁴Terrus ari ngo dak kuberitaken ketègerrenMu, kumerna kalak sinaing mengago aku enggo italuken janah ipemèla.