Read Batak Dairi Psalm 72 Bible Online

Psalm 72 - Batak Dairi bible

Psalm 72

¹Bai si Salomo nai. Alè Dèbata, ajarken mo patinMu bai raja, berrèken mo ketègerrenMu bai anak raja.

²Katerra pè ihukum i mo bangsaMu rembang mi hatoren, janah memakinken taba kalak sitertèndes hukum ntèger.

³Katerra pè nduma mo nemmuken nagerri nami janah sennang janah merdalan ketègerren bai karina bangsa.

⁴Katerra pè ipergihgihken raja mo hak ginemgem siso merho, mengurupi kalak sincor janah menumpatken kalak simenèndes kalak i.

⁵Katerra pè hot mo ia mertahan turun-tumurun sidekkah lot dèng mataniari bak bulan.

⁶Katerra pè bagè udan durèdè i jampalen, bagè udan ndor simemaing merlaè karina juma.

⁷Katerra pè muat gandana mo ketègerren sidekkah nggelluhna, janah mertinèncuk kiniduma sidekkah lot bulan.

⁸Muat mbellangna mo kerajaenna i laut nai mi laut, amak i kebincaren nai mi kesunduten.

⁹Tunduk tabasa mo pengisi padang gurun janah musuh mersembah i lebbè nènèhna.

¹⁰Raja-raja Tarsis bak pulo-pulo merembah pèlèen tabasa. Raja-raja Arab bak Etiopia roh merembah luah.

¹¹Karina raja mersembah i hadeppenna, gennep bangsa gabè hamba-hambana.

¹²Kerna ipaluah ngo kalak sitertèndes siso mergoldè, dekket kalak ncor sidilo-dilo tabasa.

¹³Masèh ngo atèna midah kalak ncor dekket jelma nterrem, janah mengurupi nggelluh kalak ndersa.

¹⁴Ipaluah ngo kalak i penèndes bak paksa nai, kumerna maharga ngo iakap nggelluh kalak i bana.

¹⁵Njuah-njuah mo raja i! Katerra pè ipèlèken mo bana emmas i Arab nai. Katerra pè isodipken mo ia gennep tikki janah dak tong ipasu-pasu.

¹⁶Katerra pè dak mbuah mo pagè i suberri nagerri, janah uruk-urukna dom buah suan-suaen. Katerra pè nggabur mo tanohna bagè Delleng Libanon, janah muat tambahna bilangen pengisi kutana bagè alah-alah i jampalen.

¹⁷Katerra pè ièngèt mo gerar raja soh sidekkah-dekkahna, janah ketermurmurenna mertambah sidekkah lot dèng mataniari. Katerra pè bangsa-bangsa mengido ipasu-pasu bagèsa, janah karina jelma mendokkensa sayurntua ia.

¹⁸Terpoji mo JAHOWA, Dèbata Israel! Pellin Ia ngo kessa pepadaken kelengangen.

¹⁹Terpoji mo gerarNa sitermurmur soh sidekkah-dekkahna; katerra pè suberri tanoh èn dom kemuliaenNa! Saut mo bagidi, Amèn!

²⁰Bagidi mo sodip si Daud, anak si Isai.