Read Batak Dairi Psalm 73 Bible Online

Psalm 73 - Batak Dairi bible

Psalm 73

¹Psalm si Asaf. Permendè basa tuhu-tuhu ngo Dèbata taba bangsaNa, bai kalak perukur mbersih.

²Tapi enggo bimbang ukurku, enggo naing-naing mèntep kepercayanku,

³kumerna cimburu aku taba kalak jukkat, tikan kuidah perlabaen kalak perjahat.

⁴Kumerna oda sakit-sakiten kalak i, mergegoh ngo daging kalak i janah merkinijuah.

⁵Oda lot igong kalak i sindersa, oda idendenni sindanggel bagè bai sidèban.

⁶Kumara i gabè tunggang mo kalak i, janah dak mengasangken gegoh.

⁷Dak kejahaten ngo ruar ibas ukur kalak idi nai; dak merempet ngo kalak i ibas taki-takina jahat i.

⁸Dak ngo kalak i mengerèhè janah pecura-curaken, janah merkata tunggang mengasup naing mendersa.

⁹Melancang ngo kalak i taba Dèbata sinisorga, janah merkata bual taba kalak sinitanoh èn,

¹⁰dungna bangsa Dèbata pè gabè merbalik taba kalak i, janah tok taba kata-kata kalak i.

¹¹Nina kalak i ngo, “Oda ibettoh Dèbata, Sintèmbul kalohon i oda mengantusi”.

¹²Bagidi mo kalak perjahat; sennang nggelluhna, hartana pukpuk tambah.

¹³Datina sambing ngo aku menjaga ukurku mbersih; oda lot gunana aku pedaohken diringku i dosa nai.

¹⁴Kerna terrus ari ngo sempa tilaka baku; gennep ceggen aku idersa.

¹⁵Mula kudokken kin bagidi, menelbuh dengan terbang dukak-dukakmu ngo aku i.

¹⁶Tapi sinderrang kucuba lako mengantusi, sulitsu ngo kuakapi.

¹⁷Dungna mbengket mo aku mi Bages Dèbata, nai kuantusi mo perdungna kalak perjahat.

¹⁸Ibakinken kono ngo kalak i i dalan sindalit, janah ibelli kono kalak i ndabuh mpustung.

¹⁹Singkerjep mata sambing ngo enggo salpun kalak i, mpiah kalohon ngo persudah kalak i.

²⁰Bagè permersep nipi siceggen ngo pengakap; tikan kèkè Kono, alè JAHOWA, mènter mersep mo kalak i.

²¹Tikan peselsel aku janah bagè sikenna tustus atè-atèngku,

²²moto ngo aku janah oda merpengantusi, bagè pinakan ngo aku i lebbèMu.

²³Bagi nola pè tong ngo aku i gembarMu, icèkèp kono ngo tangan kamuhunku.

²⁴Iteggu-teggu kono ngo aku merdengan peddah, janah ijalo kono aku seggen merdengan kesangapen.

²⁵Isè milikku i sorga laènken Kono? Oda lot sikukelemoken i tanoh èn laènken kono.

²⁶Agia nola pè ndalmeh daging bak tendingku, Kono ngo gegohku, alè Dèbata; Kono ngo sagumanna milikku soh mi sidekkah-dekkahna.

²⁷Mago ngo kalak simenadingken Kono, ibinasaken kono ngo kalak siso setia taba kono.

²⁸Tapi ukum baku sondel sellohna merian i gembar Dèbata, JAHOWA Dèbata kubakin bekkas perlenggemmenku, asa ndorok kusukutken segala pemakinNa.