Read Batak Dairi Psalm 75 Bible Online

Psalm 75 - Batak Dairi bible

Psalm 75

¹Bai simenguluken perendè. Mengèkutken lagu: Ulang salpuni. Psalm si Asaf. Endè.

²Kusembah kami ngo Kono, alè Dèbata, melias atè ukur nami baMu janah kuberitaken kami pemakinMu simahantu i.

³Nina Dèbata mo, “I tikki sienggo Kubuhul, menghukum mo Aku ibagasen katègerren.

⁴Mula dumegger tanoh èn dekket karina pengisina aku ngo petegguhken tihang-tihangna”.

⁵Taba kalak sikucul merkata bual, Kudokken asa ulang nè merkata bual.

⁶Janah bai kalak perjahat, asa ulang nèngè merpengelako jukkat. Ulang menggegahken diri barang mengerana tunggang.

⁷Kumerna oda ngo i kebincaren barang i kesunduten nai roh perhukumen oda ma i utara barang i selatan nai.

⁸Tapi Dèbata sendiri ngo menghukum, Ipesusur ngo sisada janah ipedates sidèbanna.

⁹Pungur JAHOWA tosè bagè perènumen i tanganNa, sin laè anggur mperngis ngo perènumen idi. Iorèken Dèbata mo sinna, karina perjahat sinitanoh èn kennah mengènum soh kerri.

¹⁰Tapi ukum aku dak ngo kuberitaken Dèbata si Jakob, mengendèken pemoji-mojien baNa.

¹¹Italpekken ngo kegegohen kalak perjahat, tapi ukum kalak bujur tambah mergegoh.