Read Batak Dairi Psalm 77 Bible Online

Psalm 77 - Batak Dairi bible

Psalm 77

¹Bai simenguluken perendè. Mengèkutken: Jedutun. Psalm si Asaf.

²Nggang ngo sorangku tenggo-tenggo taba Dèbata; nggang ngo sorangku dilo-dilo, janah idengkohken ngo aku.

³Tikan tersessak mersodip ngo aku taba JAHOWA; terrus berngin oda mentadi aku menarèken tanganku tabasa, tapi oda nggèut iapoi ukurku.

⁴Mula kuèngèt Dèbata, mernong-alè ngo aku, mula kupekoser-koser ibas ukurku, makin rennuk ukurku.

⁵Oda ndorok aku terpeddem tikan berngin ibakin JAHOWA, dak ngo aku bulisah gabè mak ndorok mengerana.

⁶Kupikiri ari-ari sienggo laus, kuèngèt-èngèt janah kuradumi tahun-tahun sienggo salpun.

⁷Nderrang berngin merpikir-pikir aku, janah kuso-kuso ibagasen ukurku,

⁸“Soh mi sidekkahna ngo ndia JAHOWA menulak janah oda nè malap?

⁹Mada ngo enggo ipengadi mengkekelengi kami? Oda nè ngo ndia ipahèi jandiNa?

¹⁰Enggo ngo ndia lupa Dèbata lako mengkekelengi? Melaga ngo Ia ndia, asa oda nèngè mermasèh atè?”

¹¹Nai ningku mo, “En ngo pecioken ukurku, oda merkuasa nè ukum Sintèmbul kalohon”.

¹²Naing ngo dak èngètenku karina pemakin JAHOWA, mernèngèt karina kelengangen sinihanakenMu arnia.

¹³Kupekoser-koser ngo ibagasen ukurku sagumanna sinibaingmu, janah memikiri karina pemahanMu simahantu idi.

¹⁴Alè Dèbata, mbadia ngo karina pemahanMu, isè mo tosè bagè kehejien Dèbata nami?

¹⁵Kono ngo Dèbata simenghanaken kelengangen, enggo ipetarar kono kuasaMu i tengah bangsa-bangsa.

¹⁶Merkitè kegegohenMu ipaluah kono bangsaMu, pinempar si Jakob bak si Jusup.

¹⁷Mengidah kono, alè Dèbata, laè pè gabè gontar, uè, dangaen laut pè gabè menggirgir.

¹⁸Hembun mengorèken udan, renggur purpar; gabutbat pellian mi karina arah.

¹⁹Renggur purpar, siksak pellian, mogot-ogot tanoh janah dumegger.

²⁰Merdalan ngo ko tarap galombang, mengelausi laut, tapi oda taridah ulbasMu.

²¹Bagè permakan ngo Ko memabai bangsaMu, merkitè si Musa dekket si Aron.