Read Batak Dairi Psalm 78 Bible Online

Psalm 78 - Batak Dairi bible

Psalm 78

¹Endè peddah pengajaren Asaf. Dengkohken mo ajarku, kènè alè bangsangku, peratè-atèken mo karina ranangku.

²Naing dokenkenku ngo umpama dekket codien, janah peterangken koning-koningen siarnia,

³tersèngèt sikudengkoh dekket sikujalo kami, sinisukutken empung nami.

⁴Oda uè kami memoni-moniken idi bai dukak-dukak nami; naing kusukutken kami ngo mi cundut silako roh tersèngèt kuasa JAHOWA dekket karina pemakinna simbelgah i, dekket kelengangen-kelengangen sinibakinna.

⁵Iberèken ngo patinNa bai bangsa Israel, dekket perèntahNa bai pinempar si Jakob. Idokken ngo empungta mengajarken bai dukak-dukak kalak i,

⁶asa itandai cundut silako roh Ia ninganna menerrusken ma bai dukak-dukak kalak i.

⁷Merkitè bagidi kalak i pè gabè mergantung harapenna bai Dèbata, janah oda kilupaken pemakinNa, tapi dak tunduk mi perèntahNa,

⁸asa ulang kalak i bagè empungna nggati dak memberontak bak durhaka; cundut siso tettap kepercayanna, janah oda setia bai Dèbata.

⁹Marga Efraim simersinjataken panah bak oltep, mperrus tikan mergeraha.

¹⁰Ilausi kalak i ngo perpadanenna dekket Dèbata, janah oda nggèut tunduk mi patinNa.

¹¹Lupa ngo kalak i karina pemakinNa, dekket meradepken karina kelengangen sinipetararNa bai kalak i.

¹²I lebbè empung kalak i, ihanaken Dèbata ngo kelengangen i nagerri Mesir, i napa Zoan.

¹³Ibellah ngo laut, nai meneberangken kalak i; isennak ngo laè bagè sinibendar.

¹⁴Ibabai ngo kalak i merkitè hembun tikan mahar janah merkitè bendella api suntuk berngin.

¹⁵Itaka ngo delleng batu i padang gurun, janah memerrè kalak i mènum laè meriba-iba.

¹⁶Idokken ngo uruk batu pejarirken laè, nai menjarir mo laè bagè batang laè.

¹⁷Tapi dak pukpuk ngo kalak i merdosa taba Dèbata, ngut-nguten ngo kalak i taba Sintèmbul kalohon i i gurun pasir.

¹⁸Inakkati kalak i ngo mengunjun Dèbata, merkitè mengido panganen sinipergeddo kalak i.

¹⁹Ialo kalak i ngo Dèbata merkitè mendokken, “Sanggup ngo Dèbata mèmaken pangaan i padang gurun?

²⁰Tuhu ipalu ngo delleng batu mpihir, gabè marir laè nderras kalohon. Tapi ndorok ma ngo ndia ipèmaken roti dekket memerèken gulè taba bangsaNa?”

²¹Mendengkoh i, melaga mo Dèbata janah menghukum bangsaNa merkitè api; muat tengngamNa ngo lagana taba kalak i,

²²kerna oda ngo tok ukur kalak i bai Dèbata, mi kuasaNa sindorok paluahken kalak i.

²³Tukasi pè bagidi iperèntahken ngo taba langit lako pedalngahken pèntu-pèntuna.

²⁴Irurus ngo pangaan i sorga nai, manna mahan panganen kalak i.

²⁵Iberèken ngo pangaan bai kalak i merlebbih-lebbih; mangan roti malaèkat ngo kalak i.

²⁶Idokken dèng ma ngo menempul angin kebincaren; merkitè kuasaNa mengembus ngo angin selatan.

²⁷Irurus ngo manuk-manuk bai bangsaNa, buèna tosè bagè kersik oda terbilangen.

²⁸Irurus ngo manuk-manuk i perundung-undungen i sikuliling bekkas kalak i merian.

²⁹Nai mangan mo kalak i soh bessur, kumerna enggo iberèken Dèbata kadè sinipergeddo kalak i.

³⁰Tapi oda pulak deng cubellek kalak i; jadi sinderrang mangan i dèng kalak i,

³¹gabè melaga mo Dèbata janah mengalo kalak i; ibunuh mo anak perana kalak Israel janah simergegoh.

³²Tukasi pè bagidi tong ngo iempet bangsaNa merdosa, kelengangen-kelengangen sinihanakenNa oda lot memakin kalak i gabè percaya.

³³Nai idungi Dèbata mo nggelluh kalak i bagè sinisempulken, kerri mo tahun-tahun kalak i ibagasen ukur mbiar.

³⁴Gennep ibunuh Dèbata barang piga-piga bai kalak i nai, sidèbankenna i gabè peselsel janah balik tabasa.

³⁵Ièngèt kalak i mo, Dèbata ngo perculendungen kalak i, janah Sintèmbul Kalohon i ngo penjamoti kalak i.

³⁶Tapi iluapi kalak i ngo Ia, luap tuhu-tuhu ngo karina rana kalak i.

³⁷Oda ngo setia kalak i tabasa janah oda ièngèt kalak i perpadanenNa.

³⁸Tapi mermasèh atè janah iampuni Dèbata ngo bangsaNa, janah oda kipatèken kalak i. Nggatina i Ia menondati lagaNa, janah oda peteridahken gerrah atèNa.

³⁹Ièngèt ngo magahken pellin nggelluh persigedjapen ngo kalak i, bagè angin memellus janah oda nè balik.

⁴⁰Bagi nggatina kalak i mengalo tabasa, janah memaing cio ukurNa tikan i padang gurun.

⁴¹Nggati ngo kalak i mengunjuni Dèbata, menusahi Simbadia, Dèbata Israel.

⁴²Oda ièngèt kalak idi kuasaNa, arina ipaluah kalak i bai musuh nai,

⁴³tikan ipehana kelengangen-kelengangen i Mesir, dekket tanda-tanda kelengangen i padang Zoan.

⁴⁴Batang laè-batang laè kalak i iobah gabè daroh, gabè oda ne terènumen kalak i laèna.

⁴⁵Idersa ngo kalak i merkitè naleng mbuè kalohon, janah memelli tanoh kalak i iago tekkuk.

⁴⁶Ibaing ngo roh olong dekket balang, mengkerriken peranien bak hasil juma.

⁴⁷Icèdaken ngo kayu anggur kalak i merkitè baho, dekket kayu batang ndalima kalak i merkitè hembun kimpal.

⁴⁸Ibelli ngo baho mendulpangi pinakan kalak i, dekket perkas mencalit pinakan-pinakan kalak i.

⁴⁹Ipetagas ngo lagana simenempurung i merkitè pasulakken sinuhnuhen malaèkat kematèen simemakin kalak i mendellè.

⁵⁰Oda nè isondati lagana barang mengkekelengi nggelluh kalak i, tapi membinasaken kalak i merkitè puru sampak.

⁵¹Ibunuh ngo nasa anak buka baju i gennep jabu kalak Mesir.

⁵²Nai iarak mo bangsaNa codi bagè pulungen biri-biri, janah memabai kalak i tarap padang gurun.

⁵³Ibagasen penegunegunNa mènak ngo kalak i janah oda buradan, kum musuh kalak i lenneng ngo mi bagsen laut.

⁵⁴Nai ibabai mo bangsaNa mi tanoh simbadia, mi delleng sinirampasenNa sendiri.

⁵⁵I lebbè bangsaNa ipuari ngo bangsa sinisidi nai ipempellaken mo nagerri idi bai karina marga bangsa Israel, bangsaNa i, gabè ndorok mo kalak i mengiani undung-undung musuh.

⁵⁶Tapi mengalo ngo kalak i janah mengunjuni Dèbata Sintèmbul kalohon i, perèntah-perèntahNa oda iuèi kalak i.

⁵⁷Menelbuh ngo kalak i bagè empungna, janah oda kettoken bagè baor mbekkuk.

⁵⁸Ialo kalak i ngo Dèbata merkitè memahan bekkas pemèlèen dèbata siso tuhu, janah memaingkensa cemburu mengidah gana-gana kalak i.

⁵⁹Menengen i, melaga kalohon mo Dèbata, janah menulak kalak i.

⁶⁰Itadingken mo undung-undungNa i Silo, bekkasna merian i tengah-tengah jelma.

⁶¹Ibelli mo Pèti PerpadanenNa tertaban; tanda kemulianNa irampasi musuh.

⁶²Nggerrah atèna taba bangsaNa, pusakka milikna, janah ibelli kalak i ibunuh merkitè peddang.

⁶³Anak-anak perana kalak i ipangon api; oda lot nè mengkabini berru kalak i.

⁶⁴Imam-imam kalak i ibunuh dekket peddang, daberru mbalu kalak i mak terbaingsa tangis milangi.

⁶⁵Nai kèkè mo JAHOWA bagè kalak sikèkè i peddemenna nai, bagè kalak mergegoh pul mènum anggur.

⁶⁶Talu ngo ilentem musuhNa, janah menaluken kalak i soh mi sidekkah-dekkahna.

⁶⁷Tapi itulak ngo pinempar si Jusup janah oda memilih marga Efraim.

⁶⁸SinipilihNa imo marga Juda, dekket Uruk Sion sinikekelengenNa.

⁶⁹Ipajek mo BagesNa bagè bekkasNa i sorga, janah bagè tanoh èn, ntegguh soh sidekkah-dekkahna.

⁷⁰Ipilih ngo si Daud naposoNa, janah mendiloisa i pulungen pinakan nai,

⁷¹kan bekkasna mermakan indung biri-biri nai, lako mermakani Israel bangsaNa.

⁷²Ipermakani si Daud mo kalak i ibas ukurna mbersih, janah meneggu-neggu kalak i merkitè bijak.