Read Batak Dairi Psalm 8 Bible Online

Psalm 8 - Batak Dairi bible

Psalm 8

¹Psalm si Daud. Bai simenguluken perendè. Mengèkutken lagu Gitit.

²Ialè, JAHOWA Dèbata nami, termurmur ngo kuasaMu i suberri tanoh èn! KesangapenMu mengelampoi langit

³iendèken anak-anak bak anak mbara. Ntegguh ngo kuasaMu mak terkekadè lako mengkontam musuh bak alo.

⁴Mula kutengen langit sinihanakenmu, bulan dekket karina bintang sinibaingmu,

⁵mènter kadè mo pana jelma idi, asa ièngèt kono ia, isè mo ia, asa ipehèdu-hèdu kono ia?

⁶Tapi ipekèkè kono ngo ia naing-naing dos dekket Dèbata, ibaing ko ia merrudang kesangapen bak lia.

⁷Iberrèken kono bana mengkuasai suberri dunia sagumanna sinihanakenMu ipetunduk kono bana:

⁸biri-biri, lembu dekket pinakan karina, bagi dekket binatang sinirambah talintua;

⁹manuk-manuk dekket ikan-ikan, karina simenggormit ibagasen lauten.

¹⁰Ialè JAHOWA, Jahowa nami, kemuliaenMu termurmur i suberri tanoh èn.