Read Batak Dairi Psalm 81 Bible Online

Psalm 81 - Batak Dairi bible

Psalm 81

¹Bai simenguluken perendè. Mengèkutken lagu: Gitit. Bai si Asaf nai.

²Endèken mo endè pemoji-mojien bai Dèbata, kegegohenta, mersurak merlolo atè mo bai Dèbata si Jakob.

³Palu kènè mo genderrang, merendè mo kènè, pessora kènè mo sordam bak kucapi bagè berngangin.

⁴Sempul mo sarunè tupung ari rayanta, i pèsta peltak bulan dekket i bulan Bellah Purnama.

⁵Kumerna sada hatoren ngo idi bai Israel, sada perèntah bai Dèbata si Jakob nai.

⁶Ibaing ngo idi gabè sada hatoren bai bangsa Israel, tikan kèkè ia mengalo Mesir. Kudengkoh ngo kata siso kutandai,

⁷“Enggo kuagoi boban i baramu nai, janah menalkasi jangkat i tanganmu nai.

⁸Tenggo-tenggo ngo kènè tikan kesusahen janah kupaluah ngo kènè. Kualoi ngo kènè ibas renggur bekkasku ciboni nai, kuoji ngo kènè i takal laè Meriba.

⁹Dengkohken mo sipesèngètKu, kènè alè bangsangKu, Israel, akum uè kènè mendengkohken Aku!

¹⁰Ulang lot i tengah-tengah ndènè dèbata sidèban, ulang mo sembah dèbata sidèban.

¹¹Aku ngo JAHOWA Dèbata ndènè, simemabai kènè mbungkas i Mesir nai. Tikan melèhè kènè Kuberrè ngo pangaan.

¹²Tapi oda nggèut bangsangKu mendengkohken Aku, oda uè Israel tunduk baKu.

¹³Kumara i Kubelli ngo mpihir ukur kalak i; belli mo kalak i mengèkutken lemmo atèna sendiri.

¹⁴Nong alè, ukum uè nemmuken bangsangKu mendengkohken Aku, uè kin mo nemmuken kalak i tunduk baKu,

¹⁵nai Kusudu mo pepatuken musuh kalak i, janah menaluken karina alo kalak i.

¹⁶Kutaluken mo kalak simerceggo atè baku, ihukum mo kalak i soh mi sidekkah-dekkahna.

¹⁷Tapi ukum bangsangKu naing Kuberèken mangan berras pilihen, janah pebessurenku dekket tenggoli rambah”.