Read Batak Dairi Psalm 86 Bible Online

Psalm 86 - Batak Dairi bible

Psalm 86

¹Sodip si Daud. Dak dengkohken mo sodipku, alè JAHOWA, janah aloi mo aku, kumerna ncor janah ndalmeh ngo aku.

²Jamoti mo nggelluhku, kumerna ikekelengi Kono ngo aku, paluah mo naposoMu simerketoken baMu.

³Kono ngo Dèbatangku, masèh mo atèmu baku alè JAHOWA, kumerna terrus ari ngo aku dak mersodip taba kono.

⁴Alè JAHOWA, dak pegasang mo ukur naposoMu èn, kumara taba kono ngo kuberèken ukurku.

⁵Permendè basa ngo ko, alè JAHOWA, janah uè mengampuni, dak ikekelengi kono ngo kalak simersodip taba kono merkitè kelleng mertinèncuk.

⁶Datèken mo sodipku, alè JAHOWA, dengkohken mo dilo-dilongku mengido pengurupien.

⁷Tikan posek mersodip ngo aku baMu, kumerna ialoi Kono aku.

⁸Alè JAHOWA, oda lot tuhan codi bagè Kono, oda lot simemakinken bagè sinibakinmu.

⁹Merrohen ngo karina bangsa sinijadikenmu, alè JAHOWA, lako menembah Kono dekket memoji kehejienMu.

¹⁰Kumara mahantu ngo Kono janah memakinken kelengangen kelengangen, pellin Kono ngo kessa Dèbata.

¹¹Ajarken mo hendakMu baku, alè JAHOWA, asa dak tong kuèkutken ibagasen setia; bakinken mo aku merpenguèi ibas nasa ukurku nai.

¹²Mendokken lias atè ngo aku baMu ipas nasa ukurku nai, alè JAHOWA Dèbatangku; dak naing kupoji ngo kebelgahenMu soh mi sidekkah-dekkahna.

¹³Kumerna tong ngo ikekelengi kono aku merkitè kellengmu simbelgah i; Enggo ipaluah kono kessahku i pendèban nai.

¹⁴Alè Dèbata, kèkè ngo kalak jukkat mengalo aku, sinuhnuhen kalak kejam naing memunuh aku; oda isarihken kalak idi Kono.

¹⁵Tapi ukum Kono, alè JAHOWA, Dèbata perkelleng janah permasèh atè, sobar, dom masèh atè janah setia.

¹⁶Perdatèken mo janah masèh mo atèmu baku, pergegohi janah perkinijuahi mo aku, kerna bagè inangku, aku pè merpenguèi ngo taba kono.

¹⁷Berrè mo baku tanda mendè basaMu, alè JAHOWA, asa termèla kalak simerceggo atè baku, mula idah kalak idi Kono mengurupi janah mengapoi aku.