Read Batak Dairi Psalm 88 Bible Online

Psalm 88 - Batak Dairi bible

Psalm 88

¹Endè. Psalm horong si Korah. Bai simenguluken perendè. Mengèkutken lagu: Mahalat Leanot. Endè pengajaren si Heman, kalak Ezrahi.

²Alè JAHOWA, Dèbata sipaluahken aku, tikan mahar dilo-dilo ngo aku baMu, tikan berngin mengadep ngo aku bamu.

³Katerra pè soh mo sodipku baMu, dengkohken mo dilo-dilongku.

⁴Mèduk ngo kesusahen sempa baku; enggo sensen kematèen i lebbengku.

⁵Codi ngo aku bagè kalak sinaing susur mi pendèban, bagè kalak sikerri gegoh.

⁶Itadingken ngo aku i tengah-tengah kalak simatè, bagè kalak siterbunuh, gadur ibas pendèbaen, bagè kalak sinilupakenmu, kalak siso iurupi kono nèngè.

⁷Idabuh kono ngo aku mi luhung mbages, mi liang kubur mbages janah gellap.

⁸LagaMu mendendenni aku mbotong kalohon, melala ngo aku itendes lagaMu.

⁹Ipedaoh kono supan-supanku baku nai, janah ibakin kono aku moyang atè kalak i. Terkurung ngo aku janah mak ndorok nèngè mendarat,

¹⁰matangku gabè ramben kumernaken kinidersa. Gennep ari aku dilo-dilo baMu alè JAHOWA, janah mersodip menarèken tangan.

¹¹Mada ngo ihanaken kono kelengangen bai kalak sienggo matè? Kèkè ma ngo ndia kalak i memoji Kono?

¹²Iberitaken ma ngo ndia kelleng atèMu i bagasen pendèbaen, dekket kesetiaenMu i bekkas kematèen?

¹³Lot ma ngo ndia simemettoh kelengangenMu ibas kegellapen, barang mendè basaMu i nagerri bekkas ndèba ilupaken?

¹⁴Tapi kupido ngo pengurupinMu, alè JAHOWA, gennep ceggen ngo aku mersodip bamu.

¹⁵Alè JAHOWA, kasa itulak Kono aku? Kasa ikisir kono abèMu baku nai?

¹⁶Mungkah kèdèk nai ngo mpersah janah ièkut-èkut kematèen aku, ledjasu ngo aku menggongken hukumMu.

¹⁷LagaMu sintengam idi ngo mengagoken aku; penjuhapMu mahantu membinasaken aku.

¹⁸Terrus ari lagaMu tosè bagè laè merginja mengkulilingi aku, mengkubu aku i gennep soki nai.

¹⁹Supan-supanku ipedaoh kono baku nai, kegellapen nai ngo tading mendengani aku.