Read Batak Dairi Psalm 89 Bible Online

Psalm 89 - Batak Dairi bible

Psalm 89

¹Endè sinipeddahken si Etan, kalak Ezrahi.

²Masèh atèmu, alè JAHOWA, naing kuendèken soh mi sidekkahna, kesetiaenMu dak kuberitaken turun-tumurun.

³Kumerna kubettoh ngo soh mi sidekkahna ngo kelleng atèMu, ntegguh ngo kesètiaenMu bagè langit.

⁴Idokken kono ngo, “Enggo kubakin perpadanen dekket kalak sinipilihKu; enggo merbulaban Aku bai si Daud, naposongKu:

⁵‘Kupertahanken ngo kerajaenmu soh sidekkah-dekkahna, mercundut-cundut soh mi kempu-kempumu mengkundulisa.’ ”

⁶Ipoji runggu persorga ngo nasa pemakinMu sikelengangenken i, janah mengendèken kesetiaenMu, alè JAHOWA.

⁷I langit oda lot codi bagè Kono, alè JAHOWA, oda lot singgelluh i sorga dosken Kono.

⁸Ipesangap ngo kono i tengah-tengah kalak simbadia ikebiari lampo daripada karina sinikulilingMu.

⁹Alè JAHOWA, Dèbata Pergegoh Sisotercodi, isè lot gegohna bagè Ko? Setia ngo kono i karinana alè JAHOWA.

¹⁰Kono ngo mengerajai laut sikumecaho i, janah pekomken galombangna sintengam i.

¹¹Rahab, naga laut, ilicatken kono janah ibunuh kono, merkitè tangan mergegoh italuken kono musuh-musuhMu.

¹²Kono ngo sidasa langit dekket tanoh tinempamu ngo dunia dekket nasa sinna.

¹³Kono ngo menjadiken utara dekket selatan, mersurak-surak ngo lako baMu Delleng Tabor dekket Hermon.

¹⁴Belgahna i kuasaMu, janah mahantuna i kegegohenMu!

¹⁵Ketègerren dekket hukum ngo henjellen kerajaenMu, kelleng dekket setia ntarar ibas nasa pemaingMu.

¹⁶Sayurntua ngo bangsa simerpulung memoji ko ibagasen lolo atè, singgelluh ibagasen cuhaya pekirohMu, alè JAHOWA.

¹⁷Terrus ari ngo kalak i merlolo atè janah dak tong ntegguh kumerna mendè basaMu.

¹⁸Iberrèken kono ngo bai nami kemenangen simenettap kumara mendè basaMu ngo maingken kami mennang.

¹⁹Kumara simenjamotken kami imo kalak sinipilihMu, alè JAHOWA; raja nami imo milik Dèbata simbadia Israel.

²⁰Arnia merkitè sada alaten, idokken ko taba naposoMu sibujur merukur, “Enggo kuurupi sada kalak lubalang, sada kalak siKupilih ipas ginemgem nai enggo kupedates.

²¹Enggo jumpa aku si Daud, naposongKu, janah Kuminaki ngo ia gabè raja.

²²KegegohenKu dak ngo menjamotisa, kuasangKu mo mempergegohisa.

²³Oda tertaluken musuh ia, janah oda terkekadè kalak perjahat.

²⁴Karinana musuhna Kuripasken, Kubunuh barang isè sambing merceggo atè bana.

²⁵Dak ngo aku mengkekelengisa janah setia bana, janah memakinsa muat merkuasana.

²⁶Kupebelang mo kerajaenna, i Laut Tengah nai soh mi Laè Efrat.

²⁷Nai dokenkenna mo taba Aku, ‘Kono ngo Bapangku, Dèbatangku penjamoti janah paluahken aku.’

²⁸Bakinenku mo ia gabè anakKu situaen, sitermurmurna kalohon ipas karinana nasa raja nai.

²⁹Dak Kukekelengi ngo ia soh mi sidekkahna, hot ngo padanku tabasa.

³⁰Kupertahanken ngo tahtana sidekkah lot dèng langit i babo tanoh èn, turun-tumurun pinemparna mengkundulisa.

³¹Tapi mula ilausi pinemparna patinKu, janah nggelluhna oda menguèi hatorenKu,

³²mula oda isuihken kalak i ketetapenKu janah nggelluhna oda menguèi hatorenKu,

³³hukumenKu mo kalak i dekket ligas-ligas kumernaken pengelausinna, janah Kupesempa kememago kumerna dosa-dosana.

³⁴Tapi tong ngo Kukekelengi si Daud, janah oda kuosè padanKu.

³⁵Oda Kusondati padanKu tabasa, i sikujandiken nai sada poda Kuondari.

³⁶Sikali ngo Aku merbulaban soh mi sidekkahna merkitè gararKu simbadia; oda merluap Aku bai si Daud.

³⁷Hot ngo kerajaenna sidekkah lot dèng mataniari, turun-tumurun soh mi kempuna mengkundulisa.

³⁸Dak tong ngo hot kerajaenna bagè bulan, saksi setia i babo hembun.”

³⁹Tapi bagèndari melaga ngo Kono taba raja, ipatakken janah itulak kono ngo jelma sinipilihMu.

⁴⁰Isondati kono ngo padanMu dekket naposoMu, rudangna ikebbekken kono mi bagasen kubang.

⁴¹Irumpakken kono pagar batu dingding kutana, merentuh ibakin kono bèntèng-bèntèngna.

⁴²Karina kalak simemellus mengerampasi milikna, gabè sirèhè-rèhèen ngo ia bai dengan kundulna.

⁴³Iberèken Kono ngo kemenangen bai musuh-musuhna, janah memaingken karina alona merlolo atè.

⁴⁴Balikna oda lot merlapaten ibakin kono sinjatana, oda iurupi Kono ia ibas geraha.

⁴⁵Idungi kono kuasana sitermurmur i, ipitakken kono tahtana mi tanoh.

⁴⁶Ipejoppok kono ngo kenaposonkenna, janah isangkemken kono bana kememèla.

⁴⁷Soh ndigan Kono ciboni, alè JAHOWA? Soh ndigan mergollah lagaMu bagè api?

⁴⁸Engèt mo aku bagi joppokna nggelluhku ènda, itempa kono ngo jelma bagè nggelluh persigejapen.

⁴⁹Mènter isè mo ndorok terrus nggelluh janah oda matè? Isè mo ndorok mpellut i pendèban nai?

⁵⁰Alè JAHOWA, idikè ngo tanda kelleng atèMu ibennana nai, siniperbagahmu bai si Daud merkitè mendè basaMu?

⁵¹Engèt mo alè JAHOWA, bakunè naposoMu ènda itikasi, buèna i kugongken pengelèai mèduk bangsa.

⁵²Ilèai musuh-musuhMu ngo raja sinipilihMu, alè JAHOWA, mengerèhèsa barang mikè sambing laus ia.

⁵³Poji mo JAHOWA soh sidekkah-dekkahna. Saut mo bagidi! Amèn!