Read Batak Dairi Psalm 9 Bible Online

Psalm 9 - Batak Dairi bible

Psalm 9

¹Psalm si Daud. Bai simenguluken perendè. Mengèkutken lagu Mut-Laben.

²Ibas nasa pusuh peratènku nai sèkel aku mendokken lias atè baMu, alè JAHOWA, janah menukutken pemahanMu simermulia.

³Naing meroang-oang ngo aku janah merlolo atè kumernaken Kono janah memoji gerarMu, JAHOWA Sintèmbul Kalohon.

⁴Merbalik janah mperrus ngo musuhku i hadeppenMu; terdengdeng, geppah janah matè.

⁵Kumerna mengerajai ngo Kono bagè perhukum sènteng; Enggo isampati kono perkarangku.

⁶Enggo ihukum kono bangsa-bangsa janah mengeripasken jelma perjahat; ilupaken mo kalak i soh amman sumendah.

⁷Enggo kerri musuh nami itumpatken, kuta kalak i ilala kono; oda lot nèngè mernèngètsa.

⁸Mengerajai ngo JAHOWA soh sidekkah-dekkahna; Ipecèndek tahtaNa lako menghukum dunia.

⁹Iperèntah ngo bangsa-bangsa ibagasen ntèger janah menghukum kalak i ibagasen bennar.

¹⁰JAHOWA ngo bekkas pengadu-ngaduen bai kalak sitertèndes, bekkas culèndung tikan tersessak.

¹¹Kalak simenandai Kono mengharapken kono alè JAHOWA, kalak simenembah Kono oda ngo itadingken Kono.

¹²Poji mo JAHOWA simengerajai i Sion! Sukutken mo pemakinNa taba bangsa-bangsa!

¹³Kumerna Ièngèt ngo kalak sindersa janah ilupaken uo-ouna; ihukum ngo kalak simengulaken kejukakkaten.

¹⁴Tengen mo, musuh mendersa aku; alè JAHOWA, masèh mo atèmu baku, paluah mo i kematèen i nai kessahku,

¹⁵asa kupoji Kono i hadeppen pengisi Jerusalem. Mersurak oang-oang mo aku kumerna ipaluah kono aku.

¹⁶Bangsa-bangsa siso menandai Kono ndabuh mi bagasen geddung sinikurak kalak i sendiri.

¹⁷Enggo ipetarar JAHOWA diriNa kumerna keputusenNa sintèger i. Kalak perjahat terjerumus kumerna ulah-ulahna sendiri.

¹⁸Kematèen ngo dungna bai kalak jelma perjahat, bai bangsa-bangsa siso menuihken Dèbata.

¹⁹Oda ngo lalap kalak sincor ilupaken; oda menerrus kalak sindersa mak merpengharapen.

²⁰Kèkè mo ko alè JAHOWA, hukum mo bangsa-bangsa, ulang belli jelma i menggegahken dirina.

²¹Belli mo kalak i buradan, alè JAHOWA, janah asa satdar, jelma ngo ia.