Read Batak Dairi Psalm 90 Bible Online

Psalm 90 - Batak Dairi bible

Psalm 90

¹Sodip si Musa, naposo Dèbata. Alè JAHOWA, Kono ngo bekkas nami culèndung turun-tumurun.

²Sinderrang mak dèng ihanaken delleng delleng, sinderrang mak dèng itempa kono tanoh dekket dunia èn, kono ngo Dèbata simenettap, oda mermula oda merpunca.

³Ipasulak kono ngo jelma balik mi asalna, gabè abu bagè mulana.

⁴Dosken bagè sidari ngo bamu 1000 tahun, ari bari sienggo salpun; codi bagè gèlèren mertaram tikan berngin.

⁵Ianun kono ngo kami; bagè siternipi ngo kami, bagè dukut-dukut simertunas;

⁶tikan si ceggen ia turah janah kembang, tapi gabè males enggo kessa bon ari.

⁷Tersengget ngo kami ibakin lagaMu, janah kerri binasa ibakin pungurMu.

⁸Ibakinken kono ngo kesalahen nami i hadeppenMu, ntarar ngo dosa nami simboni baMu.

⁹Joppok ngo nggelluh nami kumerna lagaMu, merpunca ngo tahun tahun nami bagè penempul kessah.

¹⁰Pellin pitupuluh tahun ngo kessa dekkah nggelluh nami, mula mergegoh kami, soh ma mo ualuhpuluh tahun. Tapi pellin mpersah dekket kinidersa sambing ngo dapetten nami; enggo kessa nggelluh sigejap mersep mo kami.

¹¹Isè ngo menandai mahantu lagaMu, barang satdar mi sinikerohken lagaMu?

¹²Pesatdar mo kami tersèngèt joppokna nggelluh èn asa gabè jelma meradat kami.

¹³Alè JAHOWA, soh ndigan Kono melaga? Dak merpengulaki mo ukurmu janah masèh mo atèmu bai naposo-naposoMu.

¹⁴Tunahken mo kelleng atèMu bai nami gennep ceggen, asa mersampang atè kami janah merendè-endè sidekkah nggelluh nami.

¹⁵Berèken kesennangen bai nami setimpal dekket kinidersa sikugongken kami i tahun-tahun mpersah.

¹⁶Tuduhken mo pemakinMu bai nami naposo-naposoMu, dekket kuasaMu raket bai pinempar nami.

¹⁷Alè JAHOWA Dèbata nami, pasu-pasu mo kami, asa merhasil karina sikubahan kami.