Read Batak Dairi Psalm 91 Bible Online

Psalm 91 - Batak Dairi bible

Psalm 91

¹Kalak siculèndung bai Sintèmbul kalohon idi, janah merian ilenggemmen Pergegoh Sisotercodi,

²ndorok mendokken bai JAHOWA, “Kono ngo menarapi dekket menjamoti aku, Dèbatangku, taba kono ngo tok aku.”

³Paluahenna ngo kono i permaraen simboni nai, dekket i sakit simerembah mi kematèen nai.

⁴Isaongi ngo kono merkitè dekket kabengNa, gabè mènak mo kono ibas pengkerudukNa; mendè basaNa bagè tambeng-tambeng mengelègenni kono.

⁵Ulang pella mbiar kono meradepken mara tikan berngin, barang penjuhap menengget tikan mahar;

⁶meradepken olpek siroh tikan gellap, barang meradepken kememago simasa tengah ari.

⁷Agia nola 1000 kalak lipput i gembarmu, janah 10.000 kettan kamuhunmu, tapi ukum kono oda kadèen.

⁸Mula itembèrèngken kono mi sikulilingmu, idahenmu mo pemales bai kalak perjahat.

⁹Kumerna JAHOWA ngo ibakin ko keperusenmu, Sintèmbul kalohon idi ibakin kono percilèndungenmu.

¹⁰Nai oda mo sempa bamu olpek, bagesmu pè oda pella kenna sempa tulbang.

¹¹Pasulakken Dèbata ngo malaèkatNa menjamotken kono, lako mengkelungkumi kono barang mikè sambing kono laus.

¹²Ibaing kalak i ngo ko mi tapap-tapap tanganna, asa ulang tertuktuk nèhèmu serrang batu.

¹³Langkahenmu mo nipè dekket biahat, mendedoh singa bajar dekket nipè merbisa.

¹⁴Nina JAHOWA ngo, “Paluahenku ngo kalak simengkekelengi Aku, simengakui Aku pè paluahenku ngo.

¹⁵Mula dilo-dilo ia taba Aku, kualoi ngo ia. Jumpa masa kepenjetten, urupenku ngo ia; paluahenku ngo ia janah berènkenku kesangapen.

¹⁶Kupepolih mo ia merkitè umur nggeddang, janah Kuperkinijuahi.”