Read Batak Dairi Psalm 92 Bible Online

Psalm 92 - Batak Dairi bible

Psalm 92

¹Endè tikan ari Sabat.

²Merandal kalohon ngo mendokken lias atè baMu, alè JAHOWA, dekket memoji Kono, Dèbata Sintèmbul kalohon;

³memeritaken kellengMu tikan siceggen, dekket mendè basaMu tikan berngin,

⁴ninganna memeltik gitar sipuluh tinali, merdengan dhah-dhah dekket kucapi.

⁵Kumerna pemaingMu peloloken ukurku, merendè merlolo atè ngo aku kumerna pemakinMu.

⁶Belgahna i karina pemakinMu, alè JAHOWA, mbagesna idi pikiren-pikirenMu!

⁷Oda terantusen kalak simoto, Oda teradumen kalak lengah.

⁸Ndorok masa ngo kalak jukkat mendè pernggelluhna codi bagè dukut, janah muat bèak bak ndumana kalak perjahat; tapi bagidi nola pè kerri ngo kalak i i binasaken,

⁹kumerna Kono ngo, alè JAHOWA, merkuasa sidekkah-dekkahna.

¹⁰Kubettoh kami ngo, idungi ngo musuhMu, alè JAHOWA, karina kalak perjahat isompar-baèrken.

¹¹Ibakin kono ngo baku bagè gegoh kerbo meriar, janah memasu-masu aku sayurntua.

¹²Kuidah ngo ketaluen musuh-musuhku, karina kalak sienggo kèkè mengalo aku, taki-taki jahat kalak i enggo kudengkoh.

¹³Mertunasi ngo kalak bujur bagè batang korma, janah ndeppur mbellen bagè kayu sempènur i Libanon.

¹⁴Bagè kayu sinisuan i Bages JAHOWA ngo kalak i, janah merrak-merrik i Bages Dèbatanta,

¹⁵kayu dak tong dèng merbuah enggo pè tua-tua, dak tong meratah bana luyun.

¹⁶Idi mo tandana magahken adil ngo JAHOWA; Ia ngo menampati Aku, oda lot kegèduken baNa.