Read Batak Dairi Psalm 94 Bible Online

Psalm 94 - Batak Dairi bible

Psalm 94

¹Alè Dèbata, Kono ngo Dèbata memaing bales, tuduhken mo pemalesMu, alè JAHOWA.

²Kèkè mo ko, alè perhukum suberri tanoh èn, hukum mo kalak sindates merukur rembang mi pemahanna.

³Alè JAHOWA, soh ndigan kalak perjahat merlolo atè? Soh ndigan, alè JAHOWA?

⁴Ipengeruapken kalak i ngo rana-rana siso selloh, janah mengasangken kejahaten kalak i.

⁵Idersa kalak i ngo bangsaMu, alè JAHOWA, janah mengelicat jelma sinipilihMu.

⁶Ibunuh kalak i ngo daberru mbalu dekket siso merbapa siso merinang dekket kalak siroh merian i nagerri èn.

⁷Nina kalak i ngo, “Oda ngo idah JAHOWA i, oda idatèken Dèbata si Jakob i.”

⁸Alè bangsangku, ulang mo bagidi moto ndènè, merguru mo kènè memakè pikiren ndènè!

⁹Dèbata ngo simaing pènggel, oda ngo Ia mendengkoh? Ia ngo memaing mata, oda ngo Ia merpendidah?

¹⁰Ia ngo mengajari bangsa-bangsa, oda ngo ma Ia menghukum? Ia ngo gabè guru karina jelma, oda ngo lot pemettohna?

¹¹Iasak JAHOWA ngo pikiren jelma, ibettoh ngo karinana idi magosia.

¹²Sayurntua ngo kalak siniajarenmu, alè JAHOWA, kalak sinipeddahimu merkitè pati-patinMu.

¹³Ipemènak kono ia tikan ari-ari kememago, soh ikurak geddung lako menangkup kalak perjahat.

¹⁴Kumara oda ngo itadingken JAHOWA ukum bangsaNa; oda ngo ibelli bagi sambing harta pusakkaNa.

¹⁵Nai ipecèndek nola mo hukum i bekkas kerungguen, karina kalak bujur menuhu-nuhuisa.

¹⁶Isè mo mengampini aku meradepken kalak durhaka? Isè mo menarapi aku mengalo kalak simengulaken jahat?

¹⁷Mula oda kin JAHOWA mengurupi aku, enggo lompat aku mi dunia kalak simatè.

¹⁸Tikan merpikir aku enggo keppè naing ndabuh, kelleng atèMu, alè JAHOWA, memakin aku nola cènder ntegguh.

¹⁹Mula rembekbekken ukurku janah bulisah, iapoi janah ipelolo kono ukurku.

²⁰Oda ngo merdengan kono dekket perhukum jahat, simenakiken kejahaten merhenjelken patiin.

²¹Mersada taki ngo kalak i mengalo kalak bujur, janah menghukum matè kalak siso mersalah.

²²Tapi JAHOWA ngo menampati aku, Dèbatangku gabè perculèndungenku.

²³Ihukum ngo kalak perjahat rembang mi kejahatenna, janah mengkontam kalak i kumarna dosana. JAHOWA Dèbatanta mo mengkontam kalak i.