Read Batak Dairi Psalm 97 Bible Online

Psalm 97 - Batak Dairi bible

Psalm 97

¹JAHOWA ngo Raja! Naing mo nemmu merlolo atè tanoh èn, janah pulo-pulo mersampang atè.

²Icingkoi hembun dekket kegellapen ngo Ia; ketègerren dekket hukum ngo henjellen pemerèntahenNa.

³Menjoror ngo api i lebbèNa, mengelekkup musuh i sikulilingNa.

⁴Pellianna menerangi dunia, menggirgir ngo tanoh èn menengensa.

⁵Delleng-delleng melala bagè liling i lebbè JAHOWA, i lebbè JAHOWA, perkuasa suberri tanoh èn.

⁶Langit memeritaken ketègerrenNa, janah karina bangsa mengidah kemulianNa.

⁷Karina kalak simenembah gana-gana kennah ipemèla, simengèltèkken ugas-ugasen siso merguna; karina sembahen kennah sujud i lebbè JAHOWA.

⁸Sennang ngo pengisi Sion dekket karina kuta i Juda tikan mendengkoh keputusen JAHOWA.

⁹Kumerna kono ngo, alè JAHOWA, mengerajai suberri tanoh èn; metunggung ngo kono mengelampoi sagumanna sembahen.

¹⁰Kènè alè simengkekelengi JAHOWA, kecegoken mo kejahaten! Kumara ijamoti JAHOWA ngo nggelluh bangsaNa, ipaluah ngo kalak i ibas kuasa kalak perjahat nai.

¹¹Enggo mbincar kecihuren bai kalak simerperukuren mbersih, dekket sampang atè bai kalak bujur.

¹²Merlolo atè mo, alè karina jelma simerperukuren mbersih kumernaken kadè sienggo ibaing JAHOWA, janah mendokken lias atè mo bai Dèbata simbadia i.