Read Batak Dairi Peddah 1 Bible Online

Peddah 1 - Batak Dairi bible

Peddah 1

¹En mo peddah pengajarien si Salomo anak si Daud, raja Israel.

²Tujunna imo lako mengurupi jelma i asa ibettoh bakunè carana asa gabè mpantas janah asa ibettoh hatoren nggelluh ninganna ndorok iarusi perumpamaen bak codien simermakna mbages kalohon i.

³Peddah pengajarien èn mengajarken bakunè carana asa ndorok jelma i nggelluh ibagasen bijak, ntèger, adil dekket bennar.

⁴Ipeddahi ngo kalak sikurang merukur gabè merpikiren ntajem, dekket kalak siposo dèng ipeddahi gabè kalak pandè janah gabè merpikiren bagè simbelgah.

⁵Merkitè peddah pengajaren èn, kalak sienggo mpantas pè gabè tambah ngo nahuna, bang kalak sienggo mersikkola pè terolih penegu-neguen.

⁶Merkitè bagidi ndorok mo iarusi kalak simboni sinibagasen peddah pengajaren i dekket mengarusi rana simpantasniasè dekket simasa sinidokken kalak i.

⁷Asa dapet nahu situhuna i, perlebbè kennah lot bai jelma i perasaen hormat janah merkebiaren midah JAHOWA. Ukum kalak simoto oda ngo ihargai perbinettohen janah oda uè iajari.

⁸Radumi mo kadè idokken partuamu bamu alè pa,

⁹kumarna siniajarken kalak i menambahi pengelakomu merandal bagè gonjè-gonjè i takal dekket borgot menambahi kinimaholimu.

¹⁰Mula iajar-ajari kalak perdosa ko alè pa, ulang uèi ajar-ajarna i.

¹¹Mula idokken kalak i, “Aci, ita sidahi jelma asa sikeroyok ia. Dua-dua ngelngelta, aci sujuhap kalak siso mersalah.

¹²Bagèndari nggelluh kalak i sennang janah njuah-njuah, tapi nahan dosken jelma patè-patèen mo kalak i.

¹³Sibuati mo harta kalak i simahargana, asa dom bagesta dekket harta rampasen.

¹⁴Ita mo èkutken! Sibagi dos pè hasil tinangko i!”

¹⁵Ulang èkutken kalak sibagidi alè pa! Pedaoh mo bamu bai kalak sibagidi nai.

¹⁶Oda terndongken kalak i ukum madèng maing jahat ia. Dak sèkel ngo kalak i terudu memunuh.

¹⁷Salang manuk-manuk oda uè masuk mi banto sinipekimbang i lebbè matana,

¹⁸tapi kalak perjahat i gabè itogongi ngo dirina sendiri — jarat simencilakai kalak i.

¹⁹Tuhu ngo, barang isè mencari pangaen merkitè kejahaten, kesahna ngo gararna.

²⁰Dengkohken mo! Dak dilo-dilo ngo kepandèen i i dalan janah dak mersurak-surak ngo i kasèan!

²¹Pingko-pingko ngo ia i pèntu pengkeruhen dekket i bekkas rami:

²²“Kènè alè jelma lengah! Soh ndigan kènè uè dak bagi sambing? Ndigan ngo ndia ketikana asa ulang uè mapas kènè midah perbinettohen dekket menulak peddah pengajaren?

²³Dengkohken ranangku mula kupesèngèt ko, asa kupacidah bamu ukurku dekket kuajarken perbinettohenku.

²⁴Enggo kudilo kènè, tapi itulak kènè janah oda isarihken kènè.

²⁵Karina peddahku oda iperatè-atèken kènè, bang sipesèngètku itulak kènè ngo.

²⁶Kemulihken i, mula mermara kènè kutertabai mo kènè. Mula buradan kènè kurisak mo kènè.

²⁷Uè, kurèhèi mo kènè mula rembekbekken kènè janah susah iserpai cilaka siroh bagè topan.

²⁸Tikan bagidi mo dilo-dilo kènè bangku, tapi oda kualoi. Dak itulusi kènè mo aku tapi oda jupa kènè aku.

²⁹Bagè jelma siso nung lolo atèna terolih perbinettohen ngo kènè janah oda uè menguèi JAHOWA.

³⁰Oda nung uè kè menjalo peddahku barang mengeradumi sipesèngètku.

³¹Kemulihken i kènè ngo mengerasai akibat ulah-ulah dekket sura-sura ndènè siso kasèa i.

³²Matè mo kalak siso bettoh-bet- tohen kumarna oda isarihken aku, janah kalak simoto pè dung mo kumarna oda iparduliken aku.

³³Tapi kalak simendengkohken ranangku terpehèdu-hèdu ngo. Mènak ngo nggelluhna oda mbiar.”