Read Batak Dairi Peddah 10 Bible Online

Peddah 10 - Batak Dairi bible

Peddah 10

¹En mo peddah pengajaren si Salomo: Anak pandè peloloken atè bapana; anak moto menusahi ukur inangna.

²Harta kumarna kejahaten oda merembahken peruntungen; tapi ukum kebujuren merembahken keluahen.

³Oda ibelli JAHOWA rapar jelma mendè merpengelako; tapi ihalangi ngo jelma jukkat asa ulang dapetsa nipergeddona.

⁴Ncor ngo jelma mahangkè; gabè bèak ngo ukum jelma ngkasah.

⁵Ukum jelma merukur pepulungken hasil tikan mosimna, tapi kalak simeddem tikan peranien, perohken kememalu mi dirina.

⁶Jelma pertèger terolih pasu-pasu. Kejahaten ngo ciboni i balik rana jelma jahat.

⁷Dosken pasu-pasu ngo pernèngèten taba jelma selloh, tapi ukum jelma jahat ndor ngo terlupaken.

⁸Jelma pandè lolo menjalo sipesèngèt; jelma moto ranana dak pilit.

⁹Jelma ntèger, mènak ngo nggelluhna; jelma penipu terbettoh ngo ujungna.

¹⁰Barang isè memoniken kebenaren, perohken kesusahen; barang isè menjabab i sintarar, mengusahaken kesennangen.

¹¹Permongkam jelma mendè, maing nggelluh meriaia, tapi ibalik kata-kata perjahat, terèkut ukur macik.

¹²Kosom perohken perubaten; ukur ngkelleng mengampuni nasa kesalahen.

¹³Jelma perukur ntajem, bijak ngo mengerana; jelma moto perlu ngo ijerra.

¹⁴Kalak bijak pedèmpuken perbinettohen; mula jelma moto mengerana, mengayaki kemagoen.

¹⁵Harta mengkelini kalak sibèak kinipersuk mendersa sincor.

¹⁶Pengelako selloh, kesennangen ngo upahna, mengulaken siso kasèa, makin mbuè mo dosana.

¹⁷Barang isè menguèi sipesèngèt, sennang mo nggelluhna; isè mèla mengakui salahna, enggo ibagasen bahaya ia.

¹⁸Barang isè memekkem kosom, jelma penipu ngo i. Barang isè peraratken kata tondal, jelma moto ngo i.

¹⁹Makin mbuè rana, makin mbuè dosa kalak simengerajai dilahna i ngo jelma sibijakna.

²⁰Rana jelma ntèger dosken pirak nitingtingi; pikiren kalak perjahat oda merarti.

²¹Rana kalak pertèger, dosken pasu-pasu bai jelma mbellang i, kemotoen jelma lengah memunuh dirina sendiri.

²²Pellin pasu-pasu JAHOWA ngo maing bèak jelma; ukum jinalang gegoh oda terbaing menambahi harta.

²³Jelma moto lolo maing kesalahen; jelma bijak dak menulusi kepantasen.

²⁴Kalak bujur dapetsa sinipergeddona; kalak perjahat dapetsa sinikebiarenna.

²⁵Mula roh kaba-kaba, ipuyu mo perjahat; tapi ukum jelma bujur hot soh mi amman sumendah.

²⁶Ulang bagah jelma mahangkè, sipellin maing sekkil ngo ia bagè acem pengèluken èpen, bak bagè cèmber pecorken mata ngo ia.

²⁷Mula naing ndekkah nggelluh pesangap mo JAHOWA; ukum jelma perjahat matè i madèng tikkina.

²⁸Siniharapken jelma bujur memaingsa mersampang atè siniharapken jelma perjahat numar oda lot kadè.

²⁹Lenggemmen JAHOWA ngo jelma bujur, tapi ibinasaken ngo jelma perjahat.

³⁰Kalak pertèger nggelluh soh sidekkah-dekkahna; kalak perjahat oda ndorok merian i tanoh pusakka.

³¹Jelma pertèger kata bijak ngo ranana; jelma perjahat ikontam mo babahna.

³²Rana jelma pertèger pesennangken ukur; rana jelma perjahat dak maing cio ukur.