Read Batak Dairi Peddah 11 Bible Online

Peddah 11 - Batak Dairi bible

Peddah 11

¹Nggerrah ngo atè JAHOWA taba jelma simemakkè dacing bècuk tapi toko ngo atèna midah jelma simemakkè dacing bennar.

²Kalak jukkat ilèai ngo, jelma percerrep ukur idi kalak bijak ngo.

³Kalak burju itolong keburjunna; kalak perluap kennah icèdai luapna.

⁴Mula sempa kematèen, oda kadè guna harta, tapi njuah-njuah ngo nggelluhmu, mula kono simpanting roka.

⁵Ketègerren jelma pertèger petègerken dalanna, tapi kalak perjahat mi kemagoen ngo ujungna.

⁶Kalak bujur maluah kumarna mbentar ukurna; kalak siso kettoken, terungkup kumarna nahakana.

⁷Mula matè kalak perjahat matè ma mo pengharapenna mengharapken gegohna sendiri kadè poda gunana.

⁸Maluah ngo kalak pertèger ibas kepècetten nai; ukum kalak perjahat terkacip ngo i sidi.

⁹Pengeranaen kalak perjahat maing mago kaltuna kepantasen jelma selloh paluahken denganna.

¹⁰Meroang-oang ngo kuta midah kiniduma jelma bujur, mersurak-surak ngo kalak mula matè jelma perjahat.

¹¹Rana selloh kalak pertèger pemendèken kuta rana kalak perjahat mencèdai kuta.

¹²Mengelèai sidèban ulaen moto ngo ukum kalak merbeddi, dak sipsip ngo.

¹³Sipesarken kabar angin oda terjèmaksa rusia, tapi ukum kalak kettoken ndorok mengerusiaken simasa.

¹⁴Mago mo bangsa mula oda lot èkuten, makin mèduk pemeddahi, makin terjamin ngo keluahen.

¹⁵Merjanji menggarar utang ni dèba perohken mara lotien ulang merjanji asa ulang mermara.

¹⁶Daberru merpengelako selloh terolih kemuliaen jelma kejam pepulungken kekayaen.

¹⁷Jelma perukur selloh pelabaken dirina tapi kalak jelma kejam mengerogiken dirina.

¹⁸Laba kalak perjahat laba i gerar ngo, laba jelma selloh laba situhuna ngo.

¹⁹Barang isè merempet maing selloh, sennang ngo nggelluhna; barang isè jengjeng maing jahat, kematèen ngo ujungna.

²⁰Nggogo atè JAHOWA midah jelma perukur nggèduk tapi ngkelleng ngo atèna midah jelma merpengelako merandal.

²¹Jelma jahat pasti kenna hukum jelma bujur maluah tan kemagoen.

²²Kinimberru daberru siso merbeddi tosè bagè emmas i muncung babi.

²³Sèkel jelma selloh dak ngo merbuahken selloh, tapi siniharapken jelma nggèduk pellin laga ngo.

²⁴Lot ngo kalak mbuas merrèken, tapi tambah kaya jong, lot ngo kalak cekkit, tapi tambah ncor.

²⁵Kalak simbuas merrèken makin merlebbih-lebbih, kalak simbuas mengurupi terolih pasu-pasu.

²⁶Barang isè menèmbun sambing isumpahi jelma tapi kalak simerdèa, ipoji dèba.

²⁷Barang isè maing mendè lolo ngo kalak midahsa; kalak simengayaki kejahaten, tersessak mo ia.

²⁸Barang isè mengasangken harta, ndabuh bagè rintangtang; kalak simpènter atè, tosè bagè bulung makin mbellang.

²⁹Kalak simenusahi pengisi bagesna kemagoen i karinana mo ia. Kalak moto gabè naposo simpantas ngo ia.

³⁰Kalak simpènter ukur terjamin nggelluhna; kalak simpantas mertambah-tambah denganna.

³¹Jelma selloh, i dunia èn pè ijalo ngo bales sinibaingna, kalak jahat bak perdosa kennah ijalo hukumenna.