Read Batak Dairi Peddah 12 Bible Online

Peddah 12 - Batak Dairi bible

Peddah 12

¹Kalak simerkelleng atè midah kepistaren, lolo mula ipesèngèt dèba; tapi ukum kalak moto ncio atèna ipesèngèt dèba.

²Jelma selloh merukur, kelemonken JAHOWA, tapi simenura-nurai kejahaten, menjalo hukumen.

³Sada kalak poda hot merkesennangen ukum kemulihken kejahaten, ukum kalak bujur tong ngo ntegguh oda terdeggerken.

⁴Sinibages burju kelolonken janah kesennangen sinibalèna, sinibages maing malu sinibalèna, tosè bagè sakit tulan mencèdai dagingna.

⁵Kalak bujur dak merandal ngo ipikirken; kalak jahat akkal macik ngo isura-suraken.

⁶Kata-kata jelma jahat mematèken; kata kalak bujur pegelluhken.

⁷Kalak jahat kennah ndabuh janah mersep oda merulbas, tapi kalak selloh hot ngo ntegguh turun-tumurun.

⁸Ipoji ngo jelma tosè mi kepantasenna; ilèai ngo jelma tosè mi kelengahenna.

⁹Lotien gabè jelma perterruh tapi lot ulaenna, daripada merlagak kalak mbelgah keppèken kurang panganna.

¹⁰Jelma selloh ipehèdu-hèdu pinakanna; tapi jelma jahat isiksa pinakanna.

¹¹Peruma-uma simertuhu-tuhu mengula, mbuè panganna, tapi kalak lengah ngo kalak simenia-niaken tikkina.

¹²Jelma jahat sèkel muat laba bai jelma durhaka nai, kalak selloh, bagè kayu merempet merbuahi.

¹³Jelma perjahat tersengkik kumarna kata siniruapkenna, kalak selloh maluah ibas nasa kepècettenna.

¹⁴Gennep jelma terolih upah tosè mi kata dekket pengelakona; iberrèken upah tosè mi sinibaingna.

¹⁵Kalak simoto oda pennah mersalah ia dok atèna, tapi kum kalak simpantas, sampang atèna mendengkoh peddah

¹⁶Mula ncio atè simoto, gejapkenna i ngo iruapken ncio atèna, tapi kalak simpantasniasè, oda isarihken agia pè ibukbuki dèba.

¹⁷Merkitè mendokken situhuna ngo jelma i pecèndekken keadilen; merkitè merluap ngo kalak maing siso keadilen.

¹⁸Pekeranaen siso merjullat, bagè peddang menusuk pusuh ndèba; rana simpantasniasè tosè tambar pemalumken.

¹⁹Terbettoh ngo luap ibagasen singkèrdep mata, tapi ukum rana tuhu hot ngo soh sidekkahna.

²⁰Jelma simenura-nurai kejahaten lemmo atèna midah siso adil jelma simengusahaken asa selloh kennah sayurntua.

²¹Kalak selloh oda nung iserpai simpersah, kalak perjahat dakdak ngo susah.

²²Nggogo ngo atè JAHOWA midah perluap; tapi lemmo ngo atèna midah kalak bujur.

²³Kalak bijak oda nung pejoloken perbinettohenna; kalak moto dak kapkapen ibas lengahna.

²⁴Karèjo mertuhu-tuhu maing kalak merkuasa; kinihangkè maing jelma i gabè hamba.

²⁵Ukur rembekbekken maing moru semangat, tapi kata melamlam pesampangken perukuren.

²⁶Kalak selloh meruntungen daripada denganna; kalak jahat laling kumarna kejahatenna.

²⁷Ukum mahangkè oda dapet sinipercinta ukurna, merkitè ngkasah mahan bahaen dapet jelma i ngo harta.

²⁸Jelma simengèkutken dalan bennar, sayurntua nggelluhna; jelma simengèkutken dalan jahat menuju mi kematèenna.