Read Batak Dairi Peddah 13 Bible Online

Peddah 13 - Batak Dairi bible

Peddah 13

¹Dukak mula bijak iperatè-atèken ngo peddah bapana; tapi ukum jelma tunggang, oda isarihken tukasi enggo terlagaen ia.

²Rana jelma selloh perohken peruntungen, kalak siso bujur, lolo midah kekerasen.

³Kalak simermanat mengerana, idi ngo menjamoti nggelluhna; tapi kalak simengerana luhlah, kemagoen sempa bana.

⁴Simahangkè mèduk sèkel atèna, tapi sada poda dapetsa; kalak ngkasah, dapetsa karina nipergeddona.

⁵Nggogo atè kalak bujur midah luap mèla janah merlèa ngo pengelako perjahat.

⁶Ketègerren mengelènggemmi jelma bujur; kejahaten maing mago jelma merdosa.

⁷Lot ngo kalak pekulah-kulahken bèak, tapi oda merharta; lot ngo kalak bagè ncor, keppè kaya jong ngo ia.

⁸Kalak sibèak, pertebbus kessahna ngo riarna; kalak ncor oda kadè mengasupsa.

⁹Bagè cuhaya merbendella ngo kalak bujur; tapi kalak perjahat tosè bagè lampu mèntep.

¹⁰Ukur ndates merembahken perubaten, jelma bijak uè menjalo peddah pengajaren.

¹¹Ndor ngo kerri kinibèak arap dalan siso puna-puna; tapi harta sinipepulung-pulung cituk-cituk, dak makin tambahna.

¹²Mula oda dapet sinipergeddo ukur, ncèda atè-atè, mula dapet sinipercinta, sampang mo atè.

¹³Kalak siso menarihken ajar JAHOWA, cilaka mo dirina; kalak simenguèi hatoren Dèbata ijalo mo upahna.

¹⁴Benna kesennangen ngo peddah simpantasniasè; mula roh asup maluah ia kumarna peddah i.

¹⁵Jelma merbeddi dak ngo ipoji-poji; kalak siso kettoken, mpersah ngo nggelluhna i.

¹⁶Kalak pandè lebbè ipikiri ngo asa ibahanken ia kalak moto mengerana-ranaken kemotoenna.

¹⁷Suruhen siso merjullat perohken cilaka suruhen sindorok kettoken perohken laba.

¹⁸Jelma siso uè iajar gabè ncor janah merlèa jelma simendengkohken ajar, gabè ihormati.

¹⁹Sondel rasana mula dapet sinipercinta! Oda ngo uè kalak moto menadingken kejahatenna.

²⁰Kalak simerdengan bak jelma mpantas, tambah mo kepantasenna; kalak simerdengan bak jelma moto, sempa mo cilaka bana.

²¹Kemagoen ngo mengeletlet kalak perdosa kalak selloh dak kesennangen ngo jalonna.

²²Jelma selloh menadingken kinibèakna bai pemparenna; kinibèak perdosa ipennep lako bai kalak bujur nggelluhna.

²³Tanoh terulang menghasilken pangaen bai jelma ncor; tapi siso adil ngo maing tanoh i oda nè iula.

²⁴Mula oda iligas dukak, merlapaten oda ngkelleng atè bana tanda ngkelleng, kennah ngo pang kita mengerotansa.

²⁵Kalak bujur dak cukup ngo bana tapi kalak jahat, dak ngo kurangen.