Read Batak Dairi Peddah 15 Bible Online

Peddah 15 - Batak Dairi bible

Peddah 15

¹Pengaloi melamlam, maing malap laga; kata nggang mendungkul laga.

²Rana kalak bijak pekelpuken ukur mi perbinettohen rana jelma lengah pellin merisi kemotoen.

³Idah JAHOWA ngo karina simasa i suberri bekkas; iperdatèken ngo karina simerandal bak singgodo.

⁴Kata-kata selloh maing roh-gèut, rana mpiah maing ndotè niat.

⁵Jelma bungur oda isarihken peddah bapana, jelma bijak ièngèt ngo sipesèngèt bana.

⁶I bages jelma selloh mèduk ngo harta; kinibèak jelma jahat mersep ibaing bencana.

⁷Rana kalak simpantas dom perbinettohen, tapi ukur kalak moto oda lot sipikiren.

⁸Ijalo JAHOWA ngo sodip jelma selloh, tapi nggogo atèna midah pèlèen jelma jahat.

⁹Nggogo atè JAHOWA midah pernggelluh jelma durhaka, tapi ikekelengi ngo jelma simengulaken lemmo atèna.

¹⁰Isiksa ngo jelma simengulaken jahat; kennah matè ngo jelma siso uè ipesèngèt.

¹¹Ibettoh JAHOWA ngo dunia kalak simatè bang simasa i sidi; oda lot mboni pikiren jelma bana nai.

¹²Oda terpesèngèt ukum jelma pengelèai; oda uè ia mengido ajar bai jelma mpantas nai.

¹³Ukur lolo maing mbinar abè; ukur melui maing daging ndotè.

¹⁴Kalak pandè menulusi perbinettohen; kalak lengah kumelèpung ibas kemotoen!

¹⁵Jelma bonek kennah dak juhap ibas nggelluhna, tapi jelma perlolo dak ngo sampang atèna.

¹⁶Lotien ngo cituk harta meradum merkebiaren midah JAHOWA, daripada mertinèncuk harta tapi meradum terendep-endep ukurna.

¹⁷Lotien ngo mangan roroh bulung-bulung tapi meradum ngkelleng atè; daripada mangan gulè merasa tapi meradum nggogo-atè.

¹⁸Jelma murah melaga perohken perubaten; kalak sobar merembahken kedamèen.

¹⁹Dak mpersah ngo iakap jelma perhangkè; oda nung kurangen jelma simpenter atè.

²⁰Dukak bijak peloloken atè bapana dukak moto oda menghargai inangna.

²¹Kemotoen ngo sampang atè sikurang roka, ukum kalak simpantas ntèger ngo pemahanna.

²²Sondat ngo sura-sura, mula oda seppè ipikiri; sahun sura-sura mula mèduk pemeddahi.

²³Rana siniruapken tupung ketikana, merambah sampang atè.

²⁴Jelma mpantas mengèkutken dalan menangkeng menuju kenggeluhen; oda ngo dalan mengencuah simenuju kematèen.

²⁵Irumpakken JAHOWA ngo bages kalak sindates ukur, tapi ikellini ngo tanoh daberru mbalu.

²⁶Midah taki-taki perjahat, nggogo ngo atè JAHOWA; tapi ukum rana selloh, sampang ngo atèNa.

²⁷Barang isè muat laba arap dalan siso halal, mencèdai sisimpangansa sendiri ngo ia. Barang isè merceggo atè midah kèpèng sisip, sennang ngo nggelluhna.

²⁸Jelma selloh dak lebbè ipikiri asa iruapken ranana; jelma jahat mengeruapken kata-kata meroha.

²⁹Idengkohken JAHOWA ngo sodip jelma simenguèisa, tapi oda isarihken jelma jukkat.

³⁰Abè mbinar pesampangken atè, berita merandal pekasahken daging.

³¹Jelma menguèi ajar, idi ngo jelma pistar.

³²Kalak siso uè iajari, oda menghargai dirina sendiri; kalak siuè menjalo sipesèngèt, sibagidi ngo gabè merbeddi.

³³Merkebiaren midah JAHOWA idi ngo benna kepantasen solo-solo kesangapen, imo ncerrep perukuren.