Read Batak Dairi Peddah 16 Bible Online

Peddah 16 - Batak Dairi bible

Peddah 16

¹Jelma ndorok maing sura-sura tapi Dèbata ngo maing keputusenna.

²Karina pemahan jelma mendè ngo dok atèna, tapi JAHOWA ngo menentuken tah selloh sinisura-surana.

³Karina sura-suramu sohken mo i bai JAHOWA, asa terbaing ko mengulakensa.

⁴Sagumanna sinibaing ni JAHOWA lot ngo tujunna; tapi tujuen perjahat imo kemagonna.

⁵Karina jelma sindates merukur iketcegoken JAHOWA; oda ibelli kalak i maluah tan hukumen.

⁶Mula setia jelma bai Dèbata, terolih pengampunen; jelma simerkebiaren midahsa oda mersaor dekket kejahaten.

⁷Mula kono pesampangken atè JAHOWAmu musuhmu kin pè ibaing gabè denganmu.

⁸Lotien ngo cituk cinari tapi arap dalan mendè, daripada mbuè cinari tapi arap dalan siso selloh.

⁹Jelma ndorok maing sura-sura, tapi JAHOWA ngo menentuken nggelluhna.

¹⁰Bai JAHOWA nai ngo ijalo raja kuasana, jadi oda salah ia maing keputusenna.

¹¹Ipergeddo JAHOWA ngo asa bujur jelma ibas pertiga-tigaen, bagi ma bang memakè dacing man timbangen.

¹²Simemaing jahat, nggogo ngo atè perkuasa kumarna adil ngo maing ntegguh pemerèntahenna.

¹³Keterangen bennar pesampangken atè penguasa, ngkelleng ngo atèna midah si bujur mengerana.

¹⁴Tosè bagè berita hukumen matè ngo pungur raja, jelma mpantasniasè dak ngo pemalapken lagana.

¹⁵Kemendèen perukuren raja perohken nggelluh mersennang-sennang tosè bagè hembun tikan leggo maing roh udan.

¹⁶Ndaoh mendèen terolih kepantasen daripada terolih emmas buratda, mahargaen ngo terolih kepistaren daripada terolih pirak.

¹⁷Jelma merandal pesingkangken dirina i kejahaten nai; jelma simendatèken nggelluhna, mengelègenni dirina sendiri.

¹⁸Kesombongen mengkerohken kememago; ndates ukur maing kedabuhenna.

¹⁹Lotien ngo ncerrep merukur janah oda merharta, daripada mengèkutken jelma tunggang dekket rebbak merbagi harta rampasenna.

²⁰Radumi mo kadè siniajarken bamu, asa dapet ko simerandal. Percayai mo JAHOWA, asa dapet ko kesennangen.

²¹Kalak pandè itandai arap ntajem pikirenna; permongkamna melamlam, ranana maing diri makin tokna.

²²Kebijaken ngo benna kesennangen nggelluh bai kalak simerbeddi; kalak lengah isiksa kebungurenna sendiri.

²³Pemikiren jelma pandè maing melamlam ranana, janah makin tokna ngo jelma mendengkoh ajarna.

²⁴Rana melamlam codi bagè tenggoli; rasana tenggi pejuahken daging ndiri.

²⁵Lot ngo dalan mpènter dok atè jelma, tapi mi kematèen ngo ujungna.

²⁶Sèkel mangan mendasdas lako merusaha; kemulihken beltek, kennah mahan bahaen mo ia.

²⁷Jelma perjahat dakdak ngo mencelakaken denganna; kata-kata pè tosè bagè api mergollah-gollah.

²⁸Jelma siso kasèa peturahken persilisihen; penukasi menirang kalak simersupan-supan.

²⁹Jelma pertaki-taki menakiken denganna, janah mengèla-ngèla kalak i mi bagasen mara.

³⁰Mermanat mo maradepken kalak tercèrem bak mengkèrdep mata, ai tupung menura-nurai jahat ngo ia ibas ukurna.

³¹Bai jelma bujur iberrèken ngo umur nggeddang; ubanna bagè rudang merlinang.

³²Lotien ngo mahal melaga daripada lot kuasa; lotien ngo petaluken diri daripada menaluken kuta.

³³Mertendung ngo jelma lako memettoh nasipna, tapi pellin JAHOWA ngo menentuken keputusenna.