Read Batak Dairi Peddah 17 Bible Online

Peddah 17 - Batak Dairi bible

Peddah 17

¹Lotien ngo sengkebabah nakan merdengan kemènaken, daripada merotcè-otcè pangaen merasa merdengan perubaten.

²Irajai naposona ngo anak tuanna simemaing kememalu janah menjalo perbagien ngo ia rebbak dekket kaka-anggi anak tuanna.

³Emmas dekket pirak ioji i peneppaen, tapi JAHOWA ngo mengoji ukur kejelmaen.

⁴Iuèi perjahat ngo ajar-ajar latlat, lolo ngo atè perluap mendengkohken tukas-tukas.

⁵Barang isè mengerèhè jelma ncor bana ndersa, tosè ngo i mengelèai Dèbata situmempasa. Barang isè lolo midah olpek denganna jelma pasti kenna hukum ngo ia.

⁶Rudang situa-tua ngo kempu-kempuna; kelolonken anak-anak imo pertuana.

⁷Jelma mersangap oda patut mengeruapken kata-kata luap, jelma moto oda nung mengeruapken kata maharga.

⁸Lot ngo merdok atè kèpèng sisip maing kelengangen; merkitè kèpèng sisip, karinana ndorok ibahanken.

⁹Mula naing ikekelengi dèba, apusken kesalahen sinibaingna. Mengongkit-ongkit kesalahen ingo menirang persupanen.

¹⁰Mahargaen ngo singkebabah sèngèt-sèngèt bai jelma mpantas, daripada seratus kali ligas-ligas bai jelma lengah.

¹¹Jelma jahat dak ngo maing keributen, tapi roh ngo mendahisa utusen ntengam imo kematèen.

¹²Lotien ngo pejumpa dekket inang geppul sikembalangen anakna, daripada dekket jelma moto i kelengahenna.

¹³Barang isè memales simendè merkitè meroha, i bagesna nai pè oda uè laus simeroha.

¹⁴Mentebenai persilisihen, tosè ngo i bagè memuka dalan laè kumarna i sumondar mo sidang madèng masa persilisihen.

¹⁵Nggogo ngo atè JAHOWA midah jelma simenuhu-nuhui jelma durhaka dekket simenalahken jelma siso mersalah.

¹⁶Siasia ngo jelma bungur mengkeriken riar menulusi kepantasen, kumarna ia oda lot merpikiren selloh.

¹⁷Dak tong ngo merkelleng atè ukum supan-supan, tapi ukum dengan sibeltek dekket ngo menggong kepersuken.

¹⁸Moto ngo jelma mula merjanji ia menggarar utang denganna.

¹⁹Jelma perkelleng atè midah dosa ngo, simerlemmo atè merselisih. Jelma perkata manggang ngo dak mencari kemagoen.

²⁰Jelma nggèduk oda sayurntua jelma perdilah robar kennah merjaya.

²¹Mula lot dukak moto dak bonek ngo atè; gabè bapa dukak moto, oda nung sampang atè.

²²Ukur lolo merembahken kinijuah daging; ukur bonek maing ndotè daging.

²³Hakim siso kasèa menjalo sisip merusia, lako pepèolken hukum mo ia.

²⁴Tujuen kalak sipandè, asa dapetsa kepantasen, tapi tujuen kalak simoto oda merkedetekken.

²⁵Dukak lengah dak menusahi bapana, dekket maing bonek atè inangna.

²⁶Oda toko mendenda jelma siso mersalah; oda patut tèndessen jelma simerpengelako merandal.

²⁷Jelma ntajem pikirenna, oda mbuè ranana. Jelma mpantas, dak mènak ngo ia.

²⁸Simoto pè nidokdok ngo pandè janah mpantas ia mula sip ia janah ikontam babahna.