Read Batak Dairi Peddah 18 Bible Online

Peddah 18 - Batak Dairi bible

Peddah 18

¹Barang isè pepinjil dirina bai sidèban nai mengkekelengi dirina sambing ngo i; karina sinidokken jelma nterrem dak ialo ngo i.

²Oda lemmo atè simoto mula iberrè pengantusien; ai sèkelna pellin naing magahken isi pusuh peratènna ngo ia.

³Sindalan ngo kejahaten dekket kelèaen, mula enggo teramin pasti mo terrèhèen.

⁴Rana ndèba ndorok bagè benna kepantasen mbages tosè bagè laut, melamlam tosè bagè laè menjarir.

⁵Oda mendè mula niampinen jelma perjahat bak menèndes jelma siso mersalah.

⁶Mula mengerana kalak simoto, perohken perubaten ngo ia janah mengido tendel.

⁷Rana jelma moto maing mago dirina; lekket ngo ia ibaing katana.

⁸Rana asung-asung ntaboh dengkohen memengketti pusuh peratèen.

⁹Jelma siso mengèngèt ulanna dos ngo i dekket kalak simaing ncèda.

¹⁰Dosken palas ntegguh ngo JAHOWA mi sidi ngo jelma bujur culèndung, nai mènak mo ia.

¹¹Dok atè sibèak hartana i ngo perculèndungenna, tosè pagar batu mengkulilingi kuta.

¹²Ndates ukur imo solo-solo kedabuhen, ncerrep ukur imo solo-solo kesangapen.

¹³Ialoi madèng idengkohken kemotoen ngo i dekket kehaipen.

¹⁴Jelma mpihir tendina, terbaingsa menggongken kepersuken; mula oda mpihir tendi, magosia pengharapen.

¹⁵Jelma mpantas dak muas mi perbinettohen; kalak bijak dak sèkel mi peddah pengajaren.

¹⁶Luah ngo memuka dalan dekket mabaisa mendahi kalak mbelgah.

¹⁷Simengerana perlebbè ibas perkara dak tuhu ngo dokatè ia, tapi keterangenna mulai ioji roh kessa alona.

¹⁸Merkitè roji ndorok petadiken persilisihen, salang peraloen samah jelma perkuasa pè ndorok ngo ipemalap.

¹⁹Mahalen ngo jolmiten dengan sibeltek sienggo ncio ukurna nibaing, daripada kuta merpagar ntegguh; perubaten tosè bagè gerruk-gerruk pengkeruhen kuta merbèntèng.

²⁰Merkitè kata siniruapken lot ngo pengennaina sikennah gongenken.

²¹Mergegoh ngo dilah lako peluahken barang mencèdai nggelluh jelma; kennah lot gongenken jelma kemulihken ranana.

²²Barang isè sienggo lot sinibagesna, dapetten perlabaen; sinibages imo sibasa-basa bai JAHOWA nai.

²³Pengido kalak sincor, i terruh tanganna; pengaloi kalak sibèak merkitè nggang sorana.

²⁴Lot ngo alè-alè oda terkettoki lot ma ngo ncelketten asa kaka-anggi.