Read Batak Dairi Peddah 19 Bible Online

Peddah 19 - Batak Dairi bible

Peddah 19

¹Lotien ngo kalak ncor tapi mendè pengelakona daripada kalak moto janah luap ia.

²Ngkasah pè kum oda ngo pandè oda ngo selloh jelma sirudu-rudu maing ia terbelèncuh.

³Maing rogi dirina sendiri ngo jelma kumarna motona, kemulihkenna i gabè isalahken nola mo JAHOWA.

⁴Kalak sibèak dak mertambah-tambah ngo denganna; kalak ncor gabè itadingken denganna.

⁵Kalak simerluap i rungguen oda maluah mak kenna hukum.

⁶Gennep jelma dak ngo muat-muat ukur perkuasa; karina jelma uè meralè-alè taba permendè basa.

⁷Jelma ncor dak merpis mata ngo kaka anggina makinsa nola mo denganna. Bakunè pè pengusahakenna oda terabinsa kalak i karina.

⁸Barang isè mengayaki kepantasen, mengkekelengi dirina; janah barang isè simengèngèt sinigurukenna, sennang mo ia.

⁹Kalak simerluap i rungguen kennah ihukum bak ibinasaken.

¹⁰Oda patut kalak simoto merlebbih-lebbih nggelluhna, janah oda patut hamba memerèntah perkuasa.

¹¹Jelma mpantas ndorok ihempek lagana, terpoji ngo Ia kumarna oda ilugun simersalah bana.

¹²Laga raja bagè perngengeng singa; kinimendè raja tosè bagè hembun simemernekki suan-suaen.

¹³Dukak moto maing olpek taba bapana. Sinibages perugal-ugal bagè laè menèktèk oda mengadi-ngadi.

¹⁴Bages dekket harta ndorok lot bai partua nai, tapi sinibages bijak, imo basa-basa bai JAHOWA nai.

¹⁵Hangkè maing jelma terpeddem lènek, janah ujungna siperhangkè kennah kelèhèen dakdak.

¹⁶Barang isè menguèi perèntah JAHOWA, maluah ngo ia, barang isè siso menghargaisa, matè ngo ia.

¹⁷Mengurupi kalak sincor, tosè ngo i pepinjamken bai JAHOWA; nai ibales JAHOWA ngo seggen i tabasa.

¹⁸Ajari dukakmu sinderrang ndorok dèng mobah ukurna; mula oda merlapaten ngo i sèkel ko memunuhsa.

¹⁹Belli mo kalak simurah melaga menggongken kemulihken lagana. Mula iurupi kono ia pellin menambahi lagana ngo kono nola.

²⁰Mula ngkasah kono merguru dekket mendengkohken peddah pengajaren, gabè jelma mpantasniasè mo ko seggen.

²¹Mèduk ngo sura-sura jelma, tapi sisautna pellin keputusen JAHOWA.

²²Bakko siniharapken bai sada kalak jelma nai imo kesètiaenna. Lotien dèng ngo ncor daripada gabè merluap.

²³Pesangap mo JAHOWA, asa sennang nggelluhmu; nai puas mo iakap ko janah maluah ibas kemagoen nai.

²⁴Lot ngo jelma oda alang-alang hangkèna; menulangken nakan mi babahna pè oda roh gèutna.

²⁵Mula ihukum kalak sombong, terolih perbinettohen mo kalak siso merpengalamen. Mula ipesèngèt kalak merbeddi, makin bijakna mo ia.

²⁶Dukak simendersa janah pelausken partuana, idi mo dukak maing malu bak merlèa.

²⁷Alè pa, mula oda nè ko uè merguru, lupa mo ko mi sienggo nigurukenmu.

²⁸Mengindangken siso tuhu, tosè ngo i mengelèai hukum maing siso puna-puna bai dèba, imo ulah-ulah jelma nggèduk.

²⁹Jelma moto bana ndates perukuren, ligas-ligas ngo bana ipek-pekken.