Read Batak Dairi Peddah 2 Bible Online

Peddah 2 - Batak Dairi bible

Peddah 2

¹Jalo mo ajarku alè pa janah dak èngèt mo sikupeddahken bamu.

²Perdatèken karina kebijaken dekket usahaken mengeradumisa.

³Uè alè pa, usahaken mo asa ntajem pikirenmu dekket pido mo pengarusien.

⁴Tulus mo i bagè menulus emmas janah jalangi mo i bagè mengayaki harta mboni.

⁵Merkitè bagidi ibettoh kono mo kadè artina merkebiaren midah JAHOWA janah gabè dapet kono mo pengarusien tersèngèt Dèbata.

⁶JAHOWA ngo merèken kepantasen; bana nai ngo terolih perbinettohen dekket pengarusien jelma i.

⁷Iurupi janah ilègenni ngo jelma perborjok-borjok dekket siso mertikas pengelakona.

⁸Ijagai JAHOWA ngo jelma simemaing adil janah idengani ngo kalak simengkekelengisa.

⁹Mula iuèi kono aku alè pa, ibettoh kono mo bakunè ngo adil, ntèger dekket merandal. Ibettoh kono ma ngo bakunè caramu nggelluh.

¹⁰Gabè kalak mpantas mo ko janah bettohenmu mo sinaing pesennangken ukurmu.

¹¹Nai iurupi pengarusien dekket kecerdasenmu mo ko,

¹²ninganna igerra mo ko mengèkutken cara pernggelluh siso kasèa, janah ma ipedaoh mo dirimu bai kalak perbabah jahat nai.

¹³Ukum kalak i oda uè mengèkutken cara pernggelluh merandal; ai merdalan arap dalan gellap janah dom dosa ngo kalak i.

¹⁴Sennang ngo kalak i arap pengelako jahat i.

¹⁵Dom akkal-akkal ngo kalak i janah cara pernggelluhna pè menurimpang.

¹⁶Ndorok ngo itulak ko alè pa, ajar-ajar daberru sibabi jalang sidak mencubuk ko merkitè kata mendè dengkohen.

¹⁷Oda setia daberru i taba sinibalèna janah enggo lupa ia padanna bai Dèbata.

¹⁸Mula laus ko mi bagesna, merlapaten ngo i mendahi kematèen ngo ko. Laus mi sidi tosè ngo laus mi napa kematèen.

¹⁹Kalak sienggo mendahisa oda nung lot nèngè balik mi dalan menuju kenggeluhen.

²⁰Kumarna i alè pa, èkutken mo codien jelma merandal, janah mengèkutken lemmo atè Dèbata mo nggelluhmu.

²¹Kumarna jelma singgelluh mengèkutken lemmo atè Dèbata, kalak sibagidi ngo perukur sènteng, kalak i ngo mengiani nagerri sienggo iperbagah JAHOWA.

²²Tapi ukum kalak perjahat dekket perdosa ibentirken Dèbata ngo karuar i nagerri i nai, bagè dukut simberkat i tanoh nai.