Read Batak Dairi Peddah 20 Bible Online

Peddah 20 - Batak Dairi bible

Peddah 20

¹Enumen mperngis maing jelma kurang ajar janah ribut. Lengah ngo jelma, mènum sanga mabuk.

²Laga raja bagè perngengeng singa kalak simendungkul lagana, i ngo mencilakai dirina.

³Pellin jelma moto ngo dak uè merubat; mula naing terpoji ipedaoh mo bana nai rubat.

⁴Peruma-uma mahangkè oda iula jumana tupung tikkina, ujungna mosin peranien kadè poda hasil jumana.

⁵Bagè laè mbages ngo pusuh peratèen jelma, tapi jelma pandè ndorok ngo menimbasa.

⁶Mèduk ngo jelma mengaku dirina dengan, tapi mahal ngo jupa ukum tuhu-tuhu dengan.

⁷Merlaba ngo dukak mula merbapa merandal dekket bujur pengelakona.

⁸Mula jerguk raja i kundulen perhukumenna, ndorok mo idah karina kejahaten.

⁹Lot ngo ndia jelma pang mendokken rana, “Mpanting ngo ukurku, oda nè merdosa aku?”

¹⁰Dacing dekket sukat-sukat siso bennar oda ikellemoken JAHOWA.

¹¹Arap pemahan dukak ndorok ngo nibettoh tah mendè pengelakona bak mpènter ukurna.

¹²Pènggel lako mendengkoh dekket mata lako menengen, duana i JAHOWA ngo menghanaken.

¹³Jelma perpeddem-peddem kennah ncor ngo ia. Jelma ngkasah mahan bahaen mertinèncuk ngo panganna.

¹⁴Dak kelsohen ngo sipenokor tersèngèt harga, tapi enggo kessa itokor, lolo mo ia tersèngèt harga sienggo bana.

¹⁵Kata merdengan perbinettohen, mahargaen ngo i daripada emmas bak berlian.

¹⁶Barang isè uè menjalapi utang sidèban, selloh ngo ibuat hartana mahan cengkeram janjina.

¹⁷Harta sinikilang, mula-mula ntaboh rasana, tapi makin ndekkah terasa mo bagè bacir nola.

¹⁸Sura-sura ndorok merhasil mula seppè itimbangi; kumarna i, ulang mergeraha ukum mak tangkas ipikiri.

¹⁹Kalak siuè mengaleng menaruhken rana oda terbonikensa rusia; jadi ulang merdengan dekket kalak singgeddang dilahna.

²⁰Jelma simenumpahi partuana, mersep ngo nggelluhna bagè togok mèntep tikala berngin gellap bulita.

²¹Harta pertebennaen mula mèter ndor dapet, ujungna keppèken oda ngo pasu-pasu.

²²Ulang baing jahat alo jahat; kettoki mo JAHOWA, Ia ngo mengurupi.

²³Dacing dekket batu dacing merdua rupa oda ikellemoken JAHOWA.

²⁴Enggo kin ngo itentuken JAHOWA perdalan nggelluh jelma i dunia èn; kumara i ngo asa oda iantusi jelma perdalan nggelluhna.

²⁵Pikiri selloh-selloh tikan madèng iniatken ko pèlèen bai JAHOWA. Tah bakunè gabè peselsel kono nola.

²⁶Raja pandè ibettoh ngo isè jelma jahat. Ihukum ngo kalak i oda meralang-alang.

²⁷Pusuh peratèen jelma imo cuhaya bai JAHOWA nai, simenuluh soh mi ukur perbagasen.

²⁸Mula raja memerèntah ibagasen kelleng, bujur dekket adil tettap mo ia merkuasa.

²⁹Anak perana ikagumi kumarna gegohna ipesangap situa-tua kemulihken ubanna.

³⁰Lot ngo sipata pengalamen mpagit mengapus kejahaten dekket pepantingken perukuren jelma.